КИІЗ
зат есім. этнографиялық. 1. Қойдың күзем жүнінен тығыз етіп басылған, үй тұрмысында пайдаланылатын бұйым. 2. Малдың жүнінен қалың, тығыз етіп басылған төсеніш. 3. ауыспалы мағына. Көктемге салым былжырап еріген қар. Киіз байпақ. этнографиялық. Етіктің ішінен киетін киізден жасалған байпақ. Киіз басты. этнографиялық. Киіз жасады, дайындады; қой жүнінен дайындап, әртүрлi ою-өрнек салынып ыстық суға пісіріліп, тапталып жасалатын төсеніштi білектедi. Киіз басу. этнографиялық. а) Сабалған, шабақталған, біркелкі етіліп тартылған, бетіне ши салынған жүнге ыстық суды себелеп құя отырып, қатар отырған үш-төрт әйел шынтақтап жинап, білегімен ұрып, басып отырып жасайтын дәстүрлі қазақ қоғамындағы киіз жасау өнері. ә) Киізді білектеу, білекпен басу. Киіз басылды. Киіз басу iсi аяқталды. Киіз басысты. Киіз басуға көмектестi. Киіз бөрік. этнографиялық. Киізден жасалған баскиім. Киіз білектеді. этнографиялық. Киізді білекпен басты, киіз дайындады. Киіз жабу. этнографиялық. Киізден жасалған жабу. Киіз жабын. этнографиялық. Киізден жасалған жабын. Киіз жеңсе. этнографиялық. Жеңсенің киізден жасалған түрі. Киіз есік. этнографиялық. Сықырлауықты сыртынан жауыптұратын, ортасы ши, астары жарғақ теріден істеліп, пісірілген ақ киізден жасалған есік. Киіз етік. этнографиялық. Киізді қалыпқа салып, тігістеріне былғарыдан сыздық салынып, қусырыла тігілген етік. Киіз кебіс. этнографиялық. Киізден дайындалған кебіс. Киіз кепе. этнографиялық. Киізбен жабылған үйшік. Киіз көпшік. этнографиялық. Киіз жастықша. Киіз күйдіріп басты. Жарақаттанған жерден қанның ағуын тоқтату мақсатымен киізді күйдіріп, жараның аузына салды. Киіз күйдіріп басу. этнографиялық. Жарақатқа қан тоқтату үшін киізді қыздырып басатын халықтық ем. Киіз кілем. этнографиялық. Ою-өрнек салынып, киізден жасалған кілем. Киіз кімдікі болса, білек сонікі. Ұжымдасып атқарған шаруада әркім өз дүниесі үшін жанын салады, күшін аямайды. Киіз қалпақ. этнографиялық. Киізден жасалған қалпақ. // Киіз қалпақ киген адам. Киіз қоя. Жебесі бір тұтам, жуандығы бас бармақтай етіп таза киізден жұмырлап тігіп жасалған қоя. Киіз пісіру. этнографиялық. Киізді ыстық су құйып, ширатып нығайту. Киіз салығы. тарихи. Киізге салынатын салық. Киіз сөмке. Киізден жасалған дорба. Киіз сырмақ. этнографиялық. Киізден дайындалған (сырылған) төсеніш. Киіз табан. Киізден жасалған жылы, жұмсақ табан. Киіз тебу. этнографиялық. Киізді тығыздау үшін жүнді ораған шиді аунатып теуіп басу. Киіз туырлық. этнографиялық. Киізден жасалған туырлық. Киіз тығын. Киізден жасалған тығын. Киіз ұйық. этнографиялық. Киізден жасалған ұйық, шұлық. Киіз ұлтарақ. Киізден жасалған ұлтарақ. Киіз ұлтарақты. Киізден жасалған ұлтарағы бар, киіз ұлтарақ салынған. Киіз үй. этнографиялық. Сүйегі шаңырақ, уық, керегеден; жабыны түндік, үзік, туырлықтан; баушуы басқұр, құр, таңғыш, шалма, баудан тұратын, шаңыраққа айнала уық қадалып, кереге басына байлана дөңгелентіп тігілетін жиналмалы үй; қазақтың дестүрлі медениетіндегі баспанасы, киізден жасалған үйлердің жалпы атауы. Киіз үй сүйегі. этнографиялық. Киіз үйдің кереге, уық, шаңырақ, сықырлауықтан тұратын негізгі қаңқасы. Киіз үйдің сыртқы әбзелдері. этнографиялық. Күн сәулесін түсіру және су өткізбеу, жылу сақтау және тағы басқа. қызметтер атқаратын әбзел – туырлық, үздік, түндік, киіз есік т.б. жалпылама атауы. Киіз шұлық. Киізден кесіп тіккен шұлық. Киіз ілмес. Қараңғы түскен кез.