ТҮНДІК
1омоним зат есім. этнографиялық. Киіз үйдің шаңырағын жауып тұратын, жаңбыр өткізбейтін, күн түсірмейтін төрт бұрышты шағын киіз. Түндігі жабылып, ошағындағы оты сөнді. Үрім-бұтақ қалмады, қырылды. Түндігін теріс айналдырды. Әлекшәлегін шығарды, астан-кестен қылды. Түндік ашты. Киіз үйдің шаңырағынан таңғы жарық түссін, ошақтан шыққан түтін сыртқа шықсын деп шаңырақты жауып тұрған шаршы киізді түрді. Түндік аштырды. Шаңырақты жауып тұрған шаршы киізді түргізді. Түндік басы. а) Түтін түтететін әрбір үй. ә) көнерген сөз. Әр түтінге, әрбір үйге салынатын салық түрі. Түндіктің бауы. этнографиялық. Шаңырақ үстінен жабылатын, киіз үй жамылғысы кесегінің ұштарын бекітетін жіптер. Түндікпенен күн берді. бейнелі сөзқолданыс. Жарық күнді көруден жазбады, басын аман, денін сау қылды.