КӨЛДЕНЕҢ
сын есім. 1. Кесекөлбеу, тік емес. //Белгілі бір заттың ені. 2. ауыспалы мағына. Тосын, кездейсоқ, аяқ астынан. 3. ауыспалы мағына. Бөтен, бөгде, жат. // Бөтен, бөгде жат адам. 4. ауыспалы мағына. Қосымша. Көлденең билік. Күтпеген жерден киліккен шешім. Көлденең кәріз. су шаруашылық. Жерасты суларын жинап ағызатын, қолдан жасалған жабық жер, құрғатқыш. Көлденең кәсіп. Негізгі қызметінен басқа қосымша пайда табатын қызмет. Көлденең кескін. су шаруашылық. Су шаруашылығындағы арналардың көлденең қимасының пішіні. Көлденең көбікауыз. Араға от тастап, адамдардың шырқын бұзатын, тосыннан келген бәдік. Көлденең көз. Бөтен кісі, сырт адам. Көлденең көк атты. Кездейсоқ адам, әйтеуір біреу. Көлденең кісі. Былайғы адам, іске қатысы жоқ кісі. Көлденең қашықтық. әскери сөз. Траекторияның ұшып шығу нүктесінен зеңбіректің көкжиегімен қиылысқан нүктесіне дейінгі арақашықтық. Көлденең қонақ. Күтпеген жерден, аяқ астынан келген мейман. Көлденең өткен көк аттыны жібермеді [ құр өткізбеді ]. Жезөкшелік істеді. Көлденең сауал. Тұтқиылдан қойылған бүкпесіз ашық сұрақ. Көлденең сөз [ әңгіме ]. Бұралқы, қыстырма, бөтен сөз. Көлденең су тұндырығы. су шаруашылық. Тік бұрышты болып келетін темір бетоннан жасалған суды тұндыратын камералы астау. Көлденең сұрақ. Тосын сұрақ. Көлденең табыс [ ақша ]. Еңбексіз табылған пайда, кіріс. Көлденең тартты. а) Білдірді, сездірді. ә) Арнады, сыйлады. б) Ұсыну, көрсету. Көлденең тұрды. Қарсы келді, кедергі, бөгет жасады. Көлденең түскен көк ине көрінгендей. Анық, айқын, алақандағыдай. Көлденеңі күректей. Жуан, ені үлкен. Көлденеңінен кез болды. Күтпеген жерден, аяқ астынан тап болды.