ЖЕРАСТЫ
сын есім. Жердің астыңғы қабатында орналасқан. Жерасты құрылыстары. а) әскери сөз. Жою құралдары әсерінен жеке құрамды, басқару пункттерін, әскери техника мен өндірістік кәсіпорындарды қорғауға арналған құрылыс түрлері. ә) Жер астына орналасқан ғимараттар. Жерасты өзендері. су шаруашылық. Жарықшақты таужыныстарда, тау үңгірлерінде және басқа да жерасты қуыстарында орналасқан, еркін ағып жататын сулар. Жерасты өткелі. Көшелердің, ғимараттардың және тағы басқа. астынан қазып жасалған, жолаушылар жүретін галерея, коридор. Жерасты өтпе жол. Көшелерді т.б. жерлерді жерасты арқылы кесіп өтетін жол. Жерасты су ағыны. су шаруашылық. Таужыныстардың ішінде ағын күшінің азаю жағына (бағытына) қарай қозғалатын жерасты суы. Жерасты сулары. су шаруашылық. Жер қыртысын құрайтын таужыныстардың ішіндегі барлық физикалық күйдегі (сұйық газ тәрізді, қатты) сулар. Жерасты суларының қоры. Сулы тау жыныстардың кеуектерінде, қуыстарында, жарықшақтарында жиналған гравитациялық судың мөлшері. Жерасты суының деңгейі. Берілген нүктедегі жерастысуының еркін немесе арындық бетінің кез келген салыстыру жазықтығына (мысалы, теңіз деңгейі) қарағандағы орны.