ТАБЫС
зат есім. 1. Белгілі бір жұмысты атқару нәтижесінде түсетін ақша, материалдық игіліктер; кіріс, пайда. 2. экономикалық. Кәсіпорындардың (фирмалардың, компаниялардың) белгілі бір уақыт кезеңіндегі қызметінің нәтижесінде (мыс., өнімді өткізуден, жұмыстарды орындаудан, қызмет көрсетуден) алатын ақшалай қаражаты немесе материалдық құндылықтары. 3. экономикалық. Өткізілген өнім мен көрсетілген қызметтің құны мен жұмсалатын шығынның арасындағы айырма ретінде алынатын өндірістікшаруашылық қызметтің нәтижесі. 4. экономикалық. Иеленушілерге төленетін дивиденд немесе бағалы қағаздың ағымдағы бағасынан алынатын пайыз, сол сияқты салым мен депозит бойынша пайыз. 5. ауыспалы мағына. Қол жеткен жетістік, жеңіс. Табысқа жету. Мақсаты орындалу, еңбегінің жемісін көру. Табысқа салынатын салық. экономикалық. Ұйымдық құрылымына, бағыныстылығы мен меншік нысанына қарамастан, кәсіпорындардың (фирмалардың) өздеріне тиесілі акцияларды, облигацияларды және басқа бағалы қағаздарды өткізуінен, бірлескен кәсіпорындарға үлестік қатысудан, бейнекөрсетімнен, көпшілік ойын-сауық шараларынан, ақшалай ұтысы бар ойын автоматтарын, ойынжүлделік аттракциондарды пайдаланудан, лотереяларды өткізуден алған табысының бір бөлігін бюджетке алу нысаны. Табыс салығы. экономикалық. Мемлекеттік, кооперативтік, қоғамдық және басқа кәсіпорындар мен ұйымдардан алынған жалақы мен басқа да төлемдер салық салу нысаны болып табылатын салық төлемінің түрі. Табыс саясаты. экономикалық. Бағаның өсуін және кәсіпорындар мен халықтың ақшалай табысын әкімшілік шаралар арқылы реттеу практикасында ақшаға сұранымды, өндірістің жалпы (макроэкономикалық) көлемін және инфляция қарқынын реттеу саясатының құрамдас бөлігі. Табыстарды теңестіру. экономикалық. Мемлекеттік, әлеуметтікэкономикалық саясат бағыттарының бірі; оның міндеті – ұлттық өнімді, өзіндік табыстар мен мүлікті бөлудегі айырмашылықтарды келісу. Табыс туралы декларация. экономикалық. Азаматтардың, лауазымды адамдардың немесе ұйымдардың табыс мөлшері мен көздері туралы мәлімдемесі, декларациясы. Табысты капиталдандыру. экономикалық. Капиталды табысқа айналдыру, яғни бөлінбеген табысты не жарғы капиталын молайту түрінде не айналым қаражатын толықтыруға бағытталған табыс түрінде өндіріске бағыттау (қайта инвестициялау).