МИ
зат есім. 1. биологиялық. Ағзадағы барлық мүшелер жүйелерінде жүретін үдерістерді үйлестіруші, реттеуші және басқарушы жүйке жүйесінің ең басты мүшесі. 2. ауыспалы мағына. Ақыл, ой, сана. Ми бағаны. анатомиялық. Жұлыннан келетін өткізгіш жолдарды жалғастыратын ми бөлігі. Ми биотоктары. биологиялық. Әлсіз электр тогінің мидағы өрісі. Ми блоктары. анатомиялық. Күрделі жан қуатының ми жартышарындағы интеграциялық құрылымының моделі. Ми бүркемесі. анатомиялық. Жоғары дәрежелі жүйкелік орталықтар орналасқан ми жабыны. Миға [ миына ] кірмеді [ енбеді, қонбады ]. Ұқпады, түсінбеді. Миға [ миына ] қонды. Ақылға кірді, көкейге қонды, ұғынды, түсінді. Миды шырмады. жергілікті сөз. Ойы кетті, назары ауды. Ми [ миы, миына ] жетті. Ақылы жетті, білді. Ми жоқ. Ақылсыз, мисыз, парасаты жоқ, миғұла. Ми жұмысы. Ақылмен, есеппен ой жүгірту арқылы атқарылатын іс, шығармашылық, қаламгерлік еңбек. Ми жүгіртті. Ойлады, ойланды, байыбына барды. Ми кептірді. Бас қатырды, әуре қылды. Мидың шайқалуы. медициналық. Мидың жұмыс қабілетін бұзатын, басқа тиген соққының әсерінен болатын ауыр жарақат. Ми көпірі. анатомиялық. Ми табанында көлденең орналасқан қомақты, жуандау құрылым. Ми күмбезі. анатомиялық. Гиппокампты аралық мидың емізікше денесімен байланыстыратын өткізгіш жол. Ми қабығы. анатомиялық. Ми мен жұлынды қаптап жатқан қабық. Ми қайнар [ қайнатар ]. Аспан айналып жерге түскендей ыстық. Ми қайнатты. Өте ыстық болды, қатты ысыды. Ми сауыты. анатомиялық. Төрт жұп және төрт тақ бас сүйектерден тұратын ми қорабының қабырғасын түзетін бас қаңқасының сүйектері. Ми суағары. анатомиялық. Ортаңғы мидың төрт төмпегі мен үлкен ми аяқшасының аралығында орналасып, аралық мидағы үшінші ми қарыншасын, ромб тәрізді мидағы төртінші ми қарыншасын жалғастыратын суағар өзек. Ми сыңарлары. анатомиялық. Оң жақ, сол жақ деп аталатын мидың екі бөлігі. Ми толмады. Ақылойы жетілмеді. Ми шарбақ. анатомиялық. Жолақты дененің ақ заты – сыртқы капсуладан кейін орналасқан жолақты дене ядросы. Миы айналды. Басы қатты, шатасты. Миы алмайтын. Ақылесі орнында емес, еш нәрсені жөнді түсіне алмайтын, есуастау. Миы аузына түстi [ құйылды ]. Басы қатты соғылды, зырқ ете қалды. Миы ашыды. Басы қатты, сенделдi, мең-зең болды. Миы бар. Есі дұрыс, ақылды. Миы жетпеді. Ары ойлап, бері ойлап, ой ұшығына жетпеді; есебін таба алмады, ақылы жетпеді. Миы қатты. Не істерін білмей дағдарды, дал болды, қатты толғанды, мең-зең сенделді. Миына енді. Ақылына қонды, түсінді. Миына қонды. Түсінерліктей, ұғынарлықтай болды. Миына құйды. Ұғындырды, түсіндірді. Миына сыймады. Ақылына қонбады, миы жетпеді. Миына сіңді. Жете ұғынды, түсінді. Миына ұрды. Басын қатырды. Миын ашытты. Басын қатырды, есін шығарды. Миын жеді. Қайталап айта беріп, миын ашытты, ақылынан адастырды. Миын су қылды. Басын қатырды, шатастырды. Миын шұқыды. Қайта-қайта айтып, мезі етті, ызыңдап қоймады, мазасын алды, миын жеді. Миыңды қашайды. Маза таптырмайды, әсіре мазалайды. Миы сау. Миы жұмыс істеп тұр, ақылесінен айырылмаған. Миы шатасты. Басы қатып кетті, миы ашыды.