ДЕНЕ
зат есім. 1. Адамның бүкіл тұла бойы. 2. биологиялық. Тiрi ағзалардың сыртқы тұрпаты. 3. физикалық. Нақтылы бір заттың бар көлемi, өн бойы. 4. астрономиялық. Жұлдыздар мен ғаламшарлар, метеорлар т.б. 5. информатикалық. Қандай да бір әрекеттердің сипаттамасынан немесе хабарламадан тұратын ақпараттық дүниенің iшкi жағы. 6. ауыспалы мағына. Адам, кісi, жан. Дене бітімi [ бітісi ]. Тұла бойы, тұлғасы, жаратылыс қалпы. Дене еңбегі. Қол күші, дене қимылы арқылы орындалатын қара жұмыс. Дене жарақаты. медициналық. Соққы, зардаптардың салдарынан денеге түсірілген жара т.б. Дене жасушалары. биологиялық. Жануарлар ағзасының мүшелерi мен ұлпаларын құрайтын жасушалар (жыныс жасушасынан басқалары). Дене жаттығулары. Денсаулықты нығайтуға бағытталған жаттығулар. Дене жылуы. физикалық. Дененің жалпы жылу сыйымдылығына жататын (дененің температурасын 1 градусқа арттыруға жұмсалатын жылу мөлшерi) ағзадағы барлық ұялардың жылу сыйымдылығы мен жылу өндіру шамасының қосындысын сипаттайтын физикалық шама. Дене қисықтығы. биологиялық. Дененің қалыпты күйінен ауытқуы. Дене қуысы. биологиялық. Ішкi мүше жүйелерi орналасқан дененің табиғи қуысы. Дене саламаттығы. Деннің саулығы, амандығы. Дене тәрбиесi. а) Мектепте жүргізілетін тәрбие жұмыстарының адам денсаулығын нығайтып, күшжігерін арттыруға бағытталған бір саласы. ә) Дене шынықтыру пәні. Дене температурасы. биологиялық. Дене жылуы. Дене тұрқы. Тұрпаты, бойы. Дене түршіктірдi. Жаныңды шошытты, аза бойын қаза тұрғызды. Дене тітіркендi. Секем алды, шошыды, тоңды. Дене шынықтыру. Денсаулықты нығайту үшін дене күштерін жетілдіру жолдары, дене шынықтырумен айналысу. Дене шынықтыру алаңы. Денешынықтыру сабағы өтетін арнайы жер, мектеп стадионы. Денесi [ тұла бойы ] ауырлады [ ауыр тартты ]. Өзін жайсыз сезіндi, өне бойы сыздады. Денесi мұздады. Суықтан, қорыққаннан т.б. денесi тоңды, түршіктi. Денесi түршіктi. Төбе шашы тік тұрды, тітіркендi.