ЖҮЙКЕ
зат есім. медициналық. Нерв; жүйке талшықтарынан құралған жүйкелік тіндердің шоғырлары. Жүйке жасушалары. биологиялық. Жүйке ұлпасының негізгі морфологиялық және қызметтік құрылымдық бөлігі. Жүйке жүйесі. анатомиялық. Адам мен жануарлар ағзасындағы мүшелер мен жүйелер әрекетін біріктіретін және олардың сыртқы ортамен үздіксіз қарымқатынасын қамтамасыз ететін жүйке тіні және олардың жиынтығы. Жүйке жүйесі аурулары. педагогикалық. Психиканың бұзылу салдарынан болатын аурулар; ағзадағы әртүрлі жүйкелердің сезімталдығы мен қызметінің бұзылуы. Жүйке жүйесінің күші. педагогикалық. Жүйке жүйесінің негізгі қасиеттерінің бірі, ми қабығы жасушаларының жұмыс қабілетінің шегін, яғни олардың тежеулі күйге (тежелуге) өтпей не өте күшті, не ұзақ әсер ететін (күші болмаса да) қозуға төзе алатын қабілеті. Жүйкені босатты. Көңілін босатты, жабырқатты, мұңайтты. Жүйкені жеді. Діңкесін құртты, жанын жеді, шаршатты. Жүйкені кесті. Мысын құртты, діңкелетті, әбден шаршатты. Жүйке өрімдері. биологиялық. Шеткі жүйке жүйесіндегі жүйкелердің тармақтарынан немесе нейроциттерден түзілген құрылымдар. Жүйкесі босады. Көңілі босады, көңілі бұзылды, жылағысы келді. Жүйкесі жұқа. Жүйкесі тозған, ашушаң. Жүйкесі жұқарды. Жүйкесі тозды, ашуланшақ болды, шаршапшалдықты. Жүйкесі құрыды. Шаршапшалдықты, діңкесі құрыды. Жүйкесін тоздырды. Жүйкесіне тиді, шаршатты, діңкелетті. Жүйкесі тозды. Шаршады, діңкеледі. Жүйке талшығы.биологиялық. Нейрология жасушаларымен (олигодендрология жасушалары) қапталған нейроцит өсіндісі – біліктік (ось) цилиндр. Жүйке түтігі. биологиялық. Эмбриондық біріншілік эктодермадан туындап, ұрық ағзасында қалыптасатын пішіні түтік тәрізді біліктік мүше. Жүйке ұштары. биологиялық. Жүйке талшықтарының соңғы ұштары.