УАҚЫТ
[ араб тілі. ] зат есім. 1. философиялық. Материяның үздіксіз дамуы мен өмір сүруінің объективті бір формасы; мезгіл, мерзім. 2. Сәт, кез, мезет. 3. ауыспалы мағына. Заман, дәуір. Уақыт бар. Әлі ерте, біраз нәрсеге үлгеруге болады деген мағынада. Уақыт бердi. Мүмкіндік туғызды, жағдай жасады. Уақыт болып қалды. Біраз уақыт өтіп кетті, белгілі бір шаруаның аяқталар мерзімі тақалды. Уақыт бірлігi. информатикалық. . Процессордың жұмыс iстеу ырғағы. Уақыт бюджеті. экономикалық. Қызметкердің, оның отбасы мүшелерінің немесе халықтың жекелеген тобының – уақытты (тәулікті, аптаны, айды, жылды) пайдалануы түрлеріне қарай оның жұмсалуын бөлу. Уақыт [ сын ] елегіне түсті. Уақыт сынынан өтті, сыналды. Уақыт жоғалту. Уақытын бос, пайдасыз, бекер істермен өткізіп алу. Уақыт жоқ. а) Қол тимейді, мұрша жоқ. ә) Болмайтын нәрсені соза беруге шыдамым келмейді деген мағынада. Уақыт [ жастық ] зуылдады. Уақыт (жастық) тез өтіп кетті. Уақыт кешті. Тағатсызданып, мазасызданып күтті. Уақыт кетіру. Уақытты босқа жіберу, өткізу, қажетсіз нәрсемен айналысу. Уақыт қоры. экономикалық. Жобаны ең ерте аяқтауға болатын уақыт пен жобаны ең кеш аяқтауға болатын уақыттың арасындағы айырмашылық. Уақыт мәшинесі. окказ. Басқа мезгілге, басқа жағдаятқа лезде тап болушылық. Уақыт нормасы. экономикалық. Тиісті біліктілігі бар бір жұмыскердің немесе жұмыскерлер тобының (бригаданың) белгілі бір ұйымдықтехникалық және табиғатклимат жағдайында өнімнің (жұмыстың) бір өлшемін орындау үшін белгіленетін жұмыс уақыты шығынының тәртіптелген шамасы. Уақыт озды. а) Аз уақыт өтті. ә) Күндер зымырады, күн артынан күн, ай артынан ай өтті. Уақыт өткізу. Кешеуілдеу, кешігіп қалу, әрекетсіз бос жіберіп алу. Уақыт өтті. Мезгілі келді, уақыт жылжыды. Уақыт санауышы. информатикалық. Таймер қызметін атқаратын компьютер құрылғысы. Уақыт супердидары. информатикалық. Машиналық таймер негізінде уақыт қызметін ұйымдастыратын операциялық жүйені басқаратын программа. Уақыт талдауышы. информатикалық. Белгілі жолға тиісті нұсқаулардың орындалу уақыттарын қосындылау негізінде немесе программаларының белгілі нүктелеріне белгілер қою және осы белгілер арасындағы программа бөлшегінің орындалу уақытын өлшеу негізінде программаның немесе программа бөлігінің орындалу уақытын бағалау немесе өлшеуге арналған аспаптық программалық құрал. Уақыт тапты. Қолы тиді, мұршасы келді. Уақыт тарихи. Уақыт аз, қысылтаяң. Уақытты бөлу. информатикалық. Бір компьютер процессорымен бір немесе бірнеше программада бірнеше есептеу процесіне кезектесіп қызмет ететін жүйелердің негізі. Уақытты бөлу жүйесі. информатикалық. Уақытты бөлу режімінде компьютер жұмысын жасақтайтын операциялық жүйе. Уақытты бөлу мониторы. информатикалық. Уақытты бөлудің операциялық жүйесі немесе оның құрауышы. Уақыт тығыз. Өте асығыс, күттірмейтін мезгіл, уақыт жоқ. Уақыттың абсолюттік аралығы. информатикалық. Программаның орындалуының басы мен соңы арасындағы айырмаға тең уақыт аралығы. Уақыттың көрмесі. бейнелі сөзқолданыс. Заман, кезең. Уақыттың нақты масштабы. информатикалық. Мәліметтер өңдеудің нақты орындалып жатқан процестерін басқару кезінде пайдаланылатын масштаб. Уақыттың ісі қиын. діни. Уақыт еш нәрсемен санаспайды, күтпейді деген мағынада. Уақытты өткізісу. Бірге бастан кешіру, бір іске ортақ болу. Уақыт үзіп кетті. жергілікті сөз. Уақыт озып кетті. Уақыт факторларын талдау. экономикалық. Келешекте болатын өзгерістерге жеткілікті сенімді көрсеткіш есебінде пайдаланылатын жағдайды ұсынуға негізделген талдау. Уақыт факторы. экономикалық. Уақыт жөнінен әрқалай белгіленген төлемдерді мәміле жасасудың басына, түрлі уақытта жұмсалған шығындар мен алынған нәтижелерді ағымдағы мезетке не есепті жылдың басына келтіру кезінде қолданылатын көрсеткіш (коэффициент, дисконттаушы көбейткіш). Уақыты бітті [ жетті, озды ]. Ғұмыры таусылды, қайтыс болды. Уақытын алды. Бiреудің уақытын босқа әңгімемен, босқа жүріспен кетірдi, мазалады. Уақытын бөлдi. Негізгi жұмысынан бөлек, басқа бір iстi iстеуге арнайы уақыт қалдырды. Уақытын қаза жібермедi. Уақытын рәсуа етпедi, бос жүріске салынбады.