КОМПЬЮТЕР
[ ағылшын тілі. cоmputer ] зат есім. информатикалық. Есептеу және ақпараттық мәселелерді шешу процестерінде ақпаратты автоматты түрде өңдеуге арналған техникалық құралдар жиынтығы. Компьютер атауы. информатикалық. Есептеу желісінде компьютерді (есептеу мәшинесін) шатастырмай табуға мүмкіндік беретін, ұзындығы 15 латын символынан аспайтын бірегей (өте сирек кездесетін) атау. Компьютер буындары. информатикалық. Сәулеті мен элементтік негізінің түрлері бойынша біріктірілген, тарихи қалыптасқан компьютер топтары. Компьютер вирусы. информатикалық. Орындалатын файлдарда, дискілердің жүйелік аймақтарында, драйверлерде, құжаттарда және тағы басқа. орналасқан, өз көшірмелерін автоматты түрде басқа бағдарламаларға жазатын шағын көлемді арнайы жазылған зиянкес бағдарлама. Компьютердің көмегімен конструкциялау. информатикалық. Автоматты түрде жобалау мен құрастыруға арналған бағдарламалар кешені. Компьютердің негізгі элементтері. информатикалық. Ақпарат түрлендіруді орындайтын қарапайым электрондық схемалар. Компьютердің разрядтылығы. информатикалық. Мәшинелік командаға бөлінген екілік разрядтардың санымен анықталатын компьютердің сипаттамасы. Компьютердің шапшаңдығы. информатикалық. Компьютер бір секундта орындайтын элементар операциялар саны. Компьютердің элементтік базасы. информатикалық. Компьютердің қызметтік құрылғылары схемаларын жасауға арналған негізгі электрондық элементтер (электрондық шамдар, транзисторлар, интегралдық схемалар). Компьютер жады. информатикалық. Мәліметтерді жазуға, сақтауға және беруге арналған құрылғы. Компьютер желісі. информатикалық. Желінің ортақ есептеу қорларын пайдалану үшін тұтынушылар қатынас құра алатын электронды есептеуіш мәшинелер мен абоненттік стансылар жиыны. Компьютер командасы. информатикалық. Компьютер жұмысының бір қадамын анықтайтын мәшине тіліндегі жарлық. Компьютер құрылымы. информатикалық. Компьютердің құрамын және оған кіретін құрауыштарды анықтайтын (тағайындайтын) модель. Компьютер операторы. информатикалық. Компьютерде жұмыс істейтін және есептеу процесін жасақтайтын маман. Компьютер ресурсы. информатикалық. Мәселені шешу үшін пайдалануға болатын бағдарламалық және аппараттық құралдардың мүмкіндігі.