ТЕХНИКАЛЫҚ
сын есім. Техникаға тән, техникаға қатысты. Техникалық бақылау. Шығарылатын бұйымдар сапасының тағайындалған стандарттар мен техникалық талаптарды қанағаттандыруын қадағалау және өндірістік ақауды жібермеу мақсатында өнеркәсіп орындарында атқарылатын жұмыстардың жиынтығы. Техникалық беріктік. техникалық. Нақты бір материалдарда қол жеткен беріктік. Техникалық білім. Өндіріс, құрылыс, көлік, байланыс, шаруашылық салаларында техникалық мәселелерді шеше білуге қажетті білім мен дағдылар кешені. Техникалық дақылдар. биологиялық. Сабағы, жапырағы, жемісі, тамыры, гүлі әртүрлі өндірісте шикізат ретінде пайдаланылатын өсімдіктер. Техникалық қызмет көрсету. Пайдалану барысында жүзеге асырылатын және пайдаланудағы немесе сақталудағы жабдықтарды күтіпбаптап, жұмысқа дайын тұруға бағытталған ұйымдықтехникалық шаралар кешені. Техникалық мақсаттағы кемелер. Су жолын тереңдету, құм, қиыршық, тас т.б. құрылыс материалдарын дайындау жұмыстарын атқаратын кеме түрі. Техникалық мата. Мәшине тетіктерін, қондырғыларды, сондай-ақ химия, автомобиль т.б. өнеркәсіп салаларындағы әртүрлі техникалық бұйымдарды дайындау үшін тікелей не жанама түрде қолданылатын тоқыма мата. Техникалық көміртек. химиялық. Жартылай жағылған немесе термиялық ыдыраған көмірсутектердің жоғары майдалы (дисперстi) өнімi. Техникалық қауіпсіздік ережесі. Техниканы дұрыс пайдалану, қауіпсіздікті сақтау тәртібі. Техникалық регламент. Стандартқа немесе ережелерге тікелей не оларға сілтеме жасау арқылы, не осы құжаттардың мазмұнын енгізу арқылы міндетті талаптар белгілейтін нормативтік құжат. Техникалық су. Техникалық мақсатқа қолдануға жарамды су. Техникалық шарттар. Нақты өнімге, үдерістерге, көрсетілетін қызметтерге немесе өнімнің бірнеше түріне қойылатын техникалық талаптарды белгілейтін нормативтік құжат. Техникалық целлюлоза. химиялық. Талшықты жартылай өнім [ Өсімдіктік шикізатты термиялық немесе химиялық өңдеу арқылы алынады, осының нәтижесінде целлюлоза емес құрауыштарының көбісі бөлініп кетеді ].