ҚАУІПСІЗДІК
зат есім. 1. Қаупі жоқтық, қатерсіздік. 2. құқық Жеке адамның, қоғамның, мемлекеттің өмірлік маңызды мүдделерінің ішкі және сыртқы қатерден қорғалуы. 3. ауыспалы мағына. Қорғаушы, күзетуші. Қауіпсіздік ережелері. Ауыр, техникалық жұмыстарды қауіпсіз жүргізудің заң күші бар негізгі қағидалары. Қауіпсіздік кеңесі. Жеке адамның, қоғамның өмірлік маңызды мүдделерінің ішкі және сыртқы қатерден қорғаудың ұйымдастырылған кеңесі. Қауіпсіздік коэффициенті. к е н. Кен денесінің объект астындағы жер қойнауында орналасу тереңдігінің сол кен қабатының қалыңдығына қатынасын анықтайтын көрсеткіш. Қауіпсіздік құрылғылары. техникалық. Түрлі электрлік аппараттарды жермен қосу (электр тогының қауіпті әсерінен қорғану мақсатында), қауіпсіздік белдіктер (биікте жұмыс істегенде) т.б. Қауіпсіздік нысандары. құқықтық. Жеке адам, оның құқықтары мен бостандықтары, қоғамның жадығаттық және рухани құндылықтары; мемлекеттің конституциялық құрылымы, егемендігі, аумақтық тұтастығы. Қауіпсіздік техникасы. техникалық. Еңбек қауіпсіздігін қамтамасыз етуге бағытталған техникалық шаралар мен құралдар жүйесі. Қауіпсіздікті қамтамасыз ету. а) Еңбек ету барысында сақталуға тиіс міндетті талаптар, шаралар жүйесі. ә) спорт. Шыңға өрмелегенде не саяхатқа шыққанда мүмкін болатын кездейсоқ жағдайлардың алдын алу шаралары.