МІНДЕТТІ
сын есім. Орындауға тиісті, борышты. Міндетті дана. ғылымтану. Ақпараттық және библиографиялық қызметті қамтамасыз ету үшін полиграфия кәсіпорындары басып шығаратын ұйымдар заңға арнаулы үкімет жарлығына сәйкес мемлекеттік кітап қоймасына, ірі кітапханаларға, ақпараттық және библиографиялық орталықтарға қорды толықтыру және орталықтанған тіркеу арқылы отандық басылымдарды есепке алу мақсатында міндетті түрде жіберіп отыратын әрбір басылымның данасы. Міндетті зейнетақы жарналары. заң. Заңға сәйкес төлемшілер мен салымшылар заңдарда белгіленген тәртіппен жинақтаушы зейнетақы қорларына салатын ақша. Міндетті келісімдер. экономикалық. Желілі басшылық жағдайындағы әкімшілік өкілеттілік нысаны. Міндетті курс. Белгілі бір талап бойынша өтілетін дәріс. Міндетті сақтандыру. экономикалық. Заң күшінен туындайтын тараптар арасындағы сақтандыру қатынастары. Міндетті сақтық қорлар нормасы. экономикалық. Орталық банктің ақшалай және несие айналымын жанама түрде реттеу тұтқаларының бірі. Міндетті түрде. Қалайда орындалуға тиіс. Міндетті шарт. Орындауға тиісті талап.