АҚПАРАТ
зат есім. 1. Дерек, хабар, мәлімет. 2. термин. ғыл. Адамның немесе арнайы құрылғылардың қабылдауымен алынатын қоршаған орта және ондағы процестер жайындағы деректер. 3. жаратыл. Табиғат пен қоғам нысандарының өзара қатынасында алмасып отыратын деректер жиынтығы. 4. информатикалық. Компьютерге енгізілетін, оның жадында сақталатын, қажет кезінде өңделетін және сыртқы ортаға берілетін мәліметтер. Ақпарат агенттігi. қоғ. әлеум. Қоғамдағы, әлемдегi жаңалықтарды таратып отыратын ресми мекеме. Ақпарат ағыны. Айналадағы өмірден алынатын деректер мен хабардың легi, қозғалысы, қарқыны. Ақпарат кеңістігi [ айдыны ]. Бұқаралық ақпарат құралдары арқылы берілген мәліметтердің таралу аймағы. Ақпарат бердi. Мәліметтермен таныстырды, iстің мәнжайынан хабардар қылды. Ақпарат берушi. термин. а) Бiлім немесе өндіріс саласында ақпараттық қызмет атқаратын маман. ә) Пайдаланушыға автоматтық түрде хабар жеткізетін жүйе. б) Қолданбалы бағдарламалар дестесінің құрауышы. Ақпарат билігi. қоғ. саяси. Ақпарат құралдарының қоғамдық пікір қалыптастыру арқылы қоғамдағы әртүрлi жағдайға әсер ете алу күшi. Ақпарат көзi. Мәлімет алынатын бастау; хабарды дайындап таратушы. Ақпарат көлемi. информатикалық. Ақпараттық iздестіру жүйесіне, сақтауыш құрылғыға және тағы басқа. енгізілетін немесе шығарылатын ақпараттың салыстырмалы сандық сипаттамасы. Ақпарат қорғау. а) құқықтық. Ақпаратты жайылудан, ұрланудан, бұрмаланып өзгертілуден сақтау үшін қолданылатын кешендi шаралар. ә) информатикалық. Мәліметтер өңдеу жүйесінде мәліметтер үшін белгіленген шектеулердi қанағаттандыруға бағытталған ұйымдастырушылық, хабарламалық және техникалық әдістер мен құралдар. Ақпарат қорғау жүйесi. құқықтық. Ақпарат қорғау бойынша жұмыс iстейтін органдар немесе атқарушылардың, сонымен бірге олардың пайдаланатын ақпарат қорғау техникасы мен қорғаныш объектілерінің жиынтығы. Ақпарат қорғау құралдары. техникалық. Мемлекеттік құпия болып табылатын мәліметтердi қорғауға арналған техникалық, криптографиялық, бағдарламалық және басқа құралдар. Ақпарат құралдары. Бұқаралық ақпарат құралдары. Ақпарат мөлшерінің бірлігi. информатикалық. Хабарламалардағы ақпарат мөлшерін анықтауға арналған бірлік. Ақпарат саясаты. қоғ. Мемлекеттік ұйымдардың қоғамдағы ақпараттар желісін дамытуға бағытталған реттеушілік қызметi. Ақпарат тарату. Бұқаралық ақпарат құралдары арқылы қоғамдықәлеуметтік мәнi бар әртүрлi деректердi қалың жұртшылықтың назарына жеткізу. Ақпарат теориясы. математикалық. Математиканың ақпаратты сақтау, түрлендіру және тасымалдау әдістерін зерттейтін бөлімi, кибернетиканың маңызды саласы. Ақпараттың ескіруі. информатикалық. Ақпараттың пендік салада өзі бейнелейтін қалыпкүйдің уақыт өте келе өзгеруіне байланысты практикалық құндылығынан айырылуы. Ақпаратты өңдеу. информатикалық. Берілген бағдарлама арқылы қолдағы мәліметтер бойынша iздестіру, сұрыптау, талдау, жинақтау әрекеттерін орындау. Ақпаратты сақтау. информатикалық. Келешекте пайдалану мақсатымен ақпаратты қосалқы сақтауыш құрылғысы – магниттік таспаға немесе магниттік дискіге жазып қою. Ақпаратты iздестіру. информатикалық. Сақталған ақпаратты алу және онымен жүзеге асырылатын негізгi операциялардың бірi. Ақпарат факторы. экологиялық. Өмірлік маңызды хабардың коды ретінде көрінетін, сондықтан тіршілік иесіне тасымалдайтын заттек пен энергия ағынына барабар емес (бірнеше есе күштірек) әсер ететін фактор.