РЕСМИ
[ араб тілі. ] сын есім. 1. Заңды, нақты. 2. Арнаулы бекітілген, арнайы. 3. Мемлекеттік іске қатысты, билікке, қоғамдық басқаруға тән. Ресми бағам. Қандай да бір валютаға мемлекеттік банк бекіткен құн. Ресми бөлім. Конференция, жиналыс т.б. шаралардың ресми түрде жүргізілетін алғашқы негізгi бөлігi. Ресми билік. Заңды билік, іс жүзіндегі мемлекеттік билік. Ресми делегация. Арнаулы делегация өкілдері. Ресми жағдай. Белгілі бір іскери қатынас тағы қалып. Ресми қабылдау. саяси. Мемлекеттік деңгейдегi жоғары басшылардың барлық заңдылықтар мен формалдылықтарды сақтай отырып, белгілi бір тұлғамен, тұлғалармен ашық жүздесуi, кездесуi. Ресми нарық. экономикалық. Арнаулы, заңды, ашық нарық. Ресми оппонент. ғыл. Диссертацияға жан-жақты мұқият талдау жасап, оның негізінде жазбаша сипаттама беретін адам. Ресми сапар. Жоғары лауазымды адамдардың қызмет бабымен қысқа мерзімді уақытта алыс, жақын шетелдерде болуы. Ресми стиль. лингвистикалық. Ресми қатынастар аясында қызмет ететін ісқағаздар стилі. Ресми трансферттер. экономикалық. Тауарларды немесе қызмет көрсетулерді сатып алуға, кредиттер беруге немесе өтелмеген борышты төлеуге байланысты емес тегін және қайтарылмайтын төлемдер. Ресми түрде. Заңды түрде. Ресми тіл. а) лингвистикалық. кітаби тіл, бейресми, сөйлеу тіліне қарама-қарсы тіл. Ресми тіл. лингвистикалық. Белгілі бір мемлекеттегі заң, сот, оқу мен ресми кеңсе қызметінде қолданылатын негізгі тілдердің бірі. Ресми хабар. Бұқаралық ақпарат құралдары арқылы одан әрі тарату мақсатымен мемлекеттік органдар беретін ақпарат.