ҚОЛТЫҚ
1омоним зат есім. 1. анатомиялық. Адамның, жануарлардың иық иінінің ішкі жағы, қолдың төспен ұштасқан тұсы. 2. Киім жеңінің боймен астасқан жері. 3. ауыспалы мағына. Белгілі бір мекенжайдың я орман-тоғай, сайсаланың тасалау, ықтасындау, ойпаңдау жері. 4. ауыспалы мағына. Қол асты, қарамағы. Қолтығына демесін болу. Сүйеу болу, көмектесу. Қолтығына дым бүрікті. а) Біреуді біреуге айдап салды, қарсы қойды, шағыстырды. ә) Қолпаштап, желіктірді. Қолтығына ел сыйды. Тату-тәтті, бірлікте тіршілік етті. Қолтығына кірді. Біреуді арқа тұтты, паналады; жақындасып, сеніміне кіріп алды, оң қолы болды. Қолтығына қысты. Панасына алды, қамқорлық етті. Қолтығынан алды. Сүйеді, демеді. Қолтығынан демеді [ сүйеді ]. а) Жүріп тұруы ауырлаған қарт кісіні қолтығынан сүйемелдеді, жәрдем берді. ә) Қамқоршы болды, демеуші болды. Қолтығынан жебеді. Демеу берді, сүйеді, қолдады. Қолтығына паналады. Біреуді сүйеніш етті, қамқорында болды. Қолтығына су бүрікті. а) Желіктірді, жел берді; айдап салды. ә) Айдап салды, желіктірдi, қайрады, шағыстырды. Қолтығына түсті. Ықпалына түсті, бағынышты болды. Қолтығына тығылды. Паналады, қорғаныш етті. Қолтығында жүрді. Панасында, аясында, қамқорында болды. Қолтығында кетті [ кете барды ]. жағымсыз. Қыз, әйел, адамның жеңіл жүрісі туралы айтылады. Қолтығын сөгу. этнографиялық. Жүйрік аттың қолтық тұсындағы тамырынан арам қан ағызу тәсілі. Қолтығы сөгілді [ жыртылды ]. Бәйге аты бауырын жазып, көсіле шапты. Қолтыққа өту. спорт. Белдесу кезінде қолтықтың астынан өтіп қарсыласының қапталынан не сырт жағынан шығып кететін балуанның әрекетамалы.