ШАҒЫН
сын есім. 1. Кішкентай, ыішам. 2. Аз санды, ортайған. 3. Аз, көп емес. Шағын аймақтағы соғыс. әскери сөз. Бір мемлекеттің өмірлік маңызды мүдделеріне әсер ететін және оның аумағынан шықпайтын әскери жанжал. Шағын алаулы оттық. техникалық. Жылыту пештері жүйесіндегі газдың тұтыну көлемін үнемдейтін оттық түрі. Шағын архитектуралық формалар. сәулет. Негізгі құрылысты сыртынан көркейтуді толықтыра түсетін құрылыстар және жабдықтар мен элементтер. Шағын аудан. Үлкен қала ішіндегі өз инфрақұрылымы бар кішігірім аудан. Шағын [ кәсіпкерлік ] бизнес. экономикалық. Ешқандай монополистік бірлестікке кірмейтін және экономикада монополияға қатысты бағынышты рөл атқаратын жеке меншіктегі ұсақ және орта кәсіпорындардың қабылданған жиынтық атауы. Шағын калибрлі винтовка. зат есім. әскери сөз. Екінші дүниежүзілік соғыстан кейін мылтық салмағын жеңілдету, оқтың қорын молайту үшін шығарылатын қару. Шағын кәсіпорын. экономикалық. Жұмысшылар саны мен шаруашылық айналымы (өнеркәсіпте өнім көлемі, саудада тауар айналымының көлемі) белгілі бір мөлшерлік өлшеммен шектелетін жаңадан құрылған немесе бұрыннан жұмыс істеп тұрған кәсіпорын. Шағын қыран. саятшылық. Дене тұрқы кішілеу келген, жемтігін теуіп алатын алғыр қыран құстар. Шағын литражды автомобиль. Қозғалтқыштың көлемі 0,85 л және массасы 700-100 кг жеңіл автокөлік. Шағын полигон. зат есім. әскери сөз. Артиллериядан атып үйретуге және атуды басқаруға арналған жабық жайдағы немесе жергілікті жердегі имитациялық құрылым.