ШАЙ
1омоним зат есім. 1. Мәңгі көгеріп тұратын ауылшаруашылық дақылына айналған сергітетін сусын дайындалатын мәдени өсімдіктің кептірілген жапырағы. 2. Шөл қандыру үшін ішетін, шайдан дайындалған сусын [ қазақтың дәстүрлі дастарқан мәзірінде шай қою, ыстық әрі сүт қатқан түрде басқа да дәммен (қант, қаймақ, талқан, жент, құрт, бауырсақ т.б.) бірге, әдетте ыстық қою тамақтан (еттен) бұрын немесе одан кейін ұсынылады ]. 3. Шай тұқымдасына жататын мәңгі жасыл ағаштар мен бұталар туысының бір түрі. Шай берді. Қонақ қылып күтті, дастарқаннан дәм татқызды. Шай бордақтады. Шайды қайнатып баптады. Шай демдеді. Шәйнектегі шайды шығарып, тұндырды, ішуге әзірледі. Шай кесе. Шай ішетін кішкене, жұқа шыны. Шай кеседей. а) үп-үлкен. ә) сүп-сүйкімді, топ-томпақ. Шай кесілді. Шайдың қызылы сұйылды, шай ағарып кетті. Шай қайнады. Шай шығарып демдейтін су қайнады. Шай қайнатым уақыт. Бір шай қайнатым мөлшеріндегі уақытты білдіретін халықтық өлшем. Шай қасық. Шай ішкенде пайдаланатын кішкентай қасық. Шай қойды. Шай қайнату қамына кірісті. Шай тостаған [ кесе ]. Шай ішуге арналған шағын ыдыс (әдетте шыныдан жасалады). Шай [ жақсы ] шықты. Шай қызыл болып бықты.