ТАУАР
[ орыс тілі. товар ] зат есім. 1. Мата. 2. экономикалық. Құны бар және қоғамда айырбас, сатып алусату жолымен бөлінетін еңбек өнімі; қажеттілікті қанағаттандыратын және рынокқа (базарға) жұрттың назарын аудару, сатып алу, пайдалану не тұтыну мақсатымен ұсынылатын нәрселер. Тауар айналымы. экономикалық. Тауарлардың өндірушіден тұтынушыға ауысу үдерісі; өндіріс құралжабдығы мен тұтыну заттарын өткізудің (сатудың) жиынтық құнын бейнелейтін экономикалық көрсеткіш. Тауар айналысы. экономикалық. Тауарларды ақшаның көмегімен айырбастау нысаны. Тауар биржасы. экономикалық. Сапасы жағынан қалыптасқан стандартқа толықтай сай келетін белгілi бір тауарларды сатып алу мен сату үшін ұйымдасқан пиасаны (рынокты) қамтамасыз етушi саудагерлер ассоциациясы. Тауар демпингi. экономикалық. Тауарларды басқа елдің рыноктарында төмендетілген бағамен сату. Тауар құны. экономикалық. Қоғамның тауарды өндіруге жұмсаған шығыны, адам еңбегінің жұмсалу мөлшері. Тауар өндіруші. экономикалық. Тұтынушыға сатылатын затты шығарушы; тауар шығарушы адам не өндіріс орны, кәсіпорын. Тауар рыногының конъюктурасы. экономикалық. Тауар рыногіндегі сұраным мен ұсынымның құрылымын, серпінін, арасалмағын айқындайтын факторлар мен жағдайлардың өзара әрекетінің нәтижесі. Тауарлардың шығарылған елі туралы куәлік. Тауардың шығарылған елін анықтайтын, осы елдің кеден органдары беретін құжат. Тауарлар жіктелімі. экономикалық. Тауарлар қозғалысын төзімділік деңгейіне қарай топтастыру. Тауар саясаты. экономикалық. Тауарға қатысты мәселелер қамтылатын кәсіпорынның маркетингілік қызметінің нышаны.