СЕГІЗ
санесім. 1. Жетіден кейінгі, тоғыздан бұрынғы есептік санесім. 2. сөйлеу. Жеті мен тоғыз жастың аралағындағы кезең. 3. сөйлеу. Тәуліктегі жиырма төрт сағаттың таңғы немесе кешкі жеті мен тоғыздың арасындағы уақыты. Сегіз арыс. этнографиялық. Сегіз рутайпадан тұратын, сегіз атадан тараған ел. Сегіз батпан. эксп p. Зiлдей, аса ауыр, салмағы үлкен. Сегіз бұт, сексен қадақ. бейнелі сөзқолданыс. Тым қиын, күрделi; ауыр деген мағынада. Сегіз жаннат [ ұжмақ ]. діни. Діни аңыз бойынша, осы дүниедегі сынақтан өткен Алла ның құлдарына Алладан нәсіп етілген сауапты істеріне, имандылық деңгейіне қарай бөлінетін мәңгілік рақат өмір сүретін о дүниедегі жаннаттың түрлері. Сегіз кессе, сіркедей қан шықпайды. Безеріп қалған, қатыгез. Сегіз қанат орда [ үй ]. этнографиялық. Керегесі сегіз болатын үлкен киіз үй. Сегіз қиыр шартарап. Күллі әлем, дүниенің төрт бұрышы. Сегіз қырлы, бір сырлы. Ішкi жандүниесi мазмұнды, бойында талай өнерқабілет бар болса да, сабырлы, қарапайым (адам). Сегіз қырлы найза. этнографиялық. Ұшы сегіз қырлы, сабы ұзын түйреуге арналған батырдың бес қаруының бірі.