ЖАРТЫ
сын есім. Бүтін нәрсенің тең бөлігі, жарымы. Жарты ауыз сөз. Аз сөз, бірауыз сөз. Жарты ғасыр. Бір ғасырдың жартысы, елу жыл. Жарты дауысты дыбыстар. лингвистикалық. А. Байтұрсынұлының қазақ тілі дыбыстарын таптасыруындағы үннің қатысына қарай үнді дауыссыздардан басым, бірақ дауысты дыбыстардан төмен тұратын дауыссыз дыбыс тобы. Жарты дәнді [ жартыны ] жарып жеді. Бүкпелемей аздың өзін бөлісіп татулықта болу, қанағат ету. Жарты жаңқам қалғанша. бейнелі сөзқолданыс. окказ. Соңғы күшім қалғанша, бар жанымды салып. Жарты жол. Жолдың жартысы, орта жол. Жарты [ кере ] қарыс. Қарыс жетпейтіндей, кез. Жарты күмбез. Жартылай шеңберлене салынған ашық күмбез. Жарты құн. тарихи. а) Жабықта (киіз үйдің жабығында) ат теуіп өлтірген балаға төленетін құн мөлшері. ә) Өлген адамның өнері үшін белгіленген төлем. Жарты [ жарым, орта, шала ] құрсақ. Тойып тамақ ішпеген, аш. Жарты құртты жарып жеді. Барын бөлісті, тату-тәтті болды. Жарты лашық. Ескі-құсқы, құрым киізден ілдалдалап жасаған баспанасымақ. Жарты [ алты ] малта ас болды [ етті ]. Ауыз жарымас ауқат талшық болды; қиыншылық көріп, ашығып күн кешті. Жарты нақыл. Бірауыз пайдалы сөз, ақыл. Жарты нан. а)Бөлкенің жартысы. ә) Талғажау боларлық, ең аз көлемдегі қарапайым адамның біркүндік асы деген мағынада. Жарты өлік. бейнелі сөзқолданыс. Дәрменсіз, қауқарсыз адам. Жарты теңге. жергілікті сөз. Азғантай ақша. Жарты терідей жалпылдады. жергілікті сөз. Жарамсақтанды. Жарты тиындық пайдасы жоқ. Ешқандай көмегі, себі жоқ. Жарты түндік. Жартылай ашылатын түндік. Жарты түсті. жергілікті сөз. Күн батты. Жарты шақырым. Бір шақырымның жартысы, 500 метр жер.