КАПИТАЛ
[ ағылшын тілі. cаpіtаl ] зат есім. экономикалық. 1. Табыс әкелетін құралдар (мүлік, ақша, жылжымайтын мүлік жиынтығы) немесе адам тіршілік әрекеті барысында тауарлар, өнімдер т.б. өндіру қызметтерін көрсету үшін жасалған ресурстар. 2. Өндіріс құралжабдығы, ақшалай қаражат, зияткерлік меншік түрінде іске жұмсалатын табыстың жұмыс істеп тұрған қайнар көзі. 3. советизм. Ленинизмде қосымша құн түсіретін, құн түріндегі капиталистердің жалдамалы жұмысшылардың еңбегін қанау жағдайын көрсететін ұғым. 4. сөйлеу. Өсіммен берген ақшадан түскен пайда, қосымша құннан түскен құн. Капитал айналымы. экономикалық. Дүркін-дүркін жаңарып отыратын процесс ретінде қаралатын капиталдың дәйекті түрде авансылануын (өндіріс құралжабдығын сатып алуға, еңбекақы төлеуге аванс берілуін), өндірістік тауардың өткізілуін, бастапқы нысанға қайтып оралуын қамтитын ауыспалы айналымы. Капитал әкетілімі. экономикалық. Басқа елдерден нақты активтер мен бағалы қағаздар сатып алу үшін елдің заңды немесе жеке тұлғалары жұмсаған шығындардың сомасы. Капиталдар рыногы. экономикалық. Капитал нарығы. Капиталдың айналымдылығы. экономикалық. Инвестициялық жобаларды жүзеге асыруға авансыланған ақшалай қаражаттың қайтарылу жылдамдығы. Капиталдың ауыспалы айналымы. экономикалық. Капиталдың өндіріс саласындағы қозғалыс процесі. Капиталдың қорлануы. экономикалық. Қосымша құнның бір бөлігінің капиталға айналуы және оның капиталистік өндірісті ұлғайтуға пайдаланылуы. Капиталдың орталықтануы. экономикалық. Бірнеше капиталдарды неғұрлым ірі бір капиталға біріктіру нәтижесінде капитал мөлшерінің өсуі. Капиталдың пайдалылығы. экономикалық. Жұмсалған капиталдың бір теңгесіне шаққандағы алынған пайданың шамасын сипаттайтын көрсеткіш. Капиталдың тәуелділік коэффициенті. экономикалық. Артықшылықты бағалы қағаздар бойынша сатып алынған капиталдың компания капиталына қатынасы. Капиталдың шоғырлануы. экономикалық. Капиталдың қорлануы барысында жеке капитал көлемінің ұлғаюы, қосымша құнның капиталға айналуы. Капитал жұмсалымы. экономикалық. Негізгі капиталға инвестиция салу, жаңа құрылысқа, жұмыс істеп тұрған кәсіпорындарды кеңейтуге шығын жұмсау, негізгі және айналым қорларының көлемін ұлғайтуға, құрылымын жақсартуға жұмсалатын бір жолғы шығын сомасы. Капитал нарығы. экономикалық. Орташа және ұзақ мерзімді несие капиталына сұраным қалыптастыру аясы болып табылатын несие капиталдары рыногының бір бөлігі. Капитал сыйымдылығы. экономикалық. Негізгі капиталдың тиісті кезінде өндірілген өнімге немесе оның бір бөлігіне қатынасымен айқындалатын көрсеткіш. Капитал экспорты. экономикалық. Капиталды шетелге шығару. Капиталдың органикалық құрамы. экономикалық. Тұрақты капиталдың ауыспалы капиталға қатынасынан пайда болатын құндық құрамы.