БАҒАЛЫ
сын есім. 1. Бағасы жоғары, қымбат. 2. ауыспалы мағына. Құнды, асыл, мәнi зор. Бағалы қағаздар. экономикалық. Иеленушісіне мүліктік құқық және дивиденд, пайыз түрінде белгілi бір ақша сомасын алуға құқық беретін құжаттар (акциялар, облигациялар және тағы басқа.). Бағалы қағаздар айналысы. экономикалық. Инвестициялық институттардың делдалдығымен бағалы қағаздардың инвесторлар арасында сатып алынуы және сатылуы. Бағалы қағаздар бағамы. экономикалық. Бағалы қағаздардың сатылатын және сатып алынатын бағасы. Бағалы қағаздар маркетингі. экономикалық. Тақырыбы бағалы қағаздар болып табылатын әртараптандырылған нысаналы тауар маркетингі. Бағалы қағаз ұстаушы. экономикалық. Акция, облигация, ақша сертификаттары сияқты бағалы қағаздардың иесi. Бағалы мемлекеттік қағаздар. экономикалық. Мемлекет меншігіндегi қандай да бір мүліктік құқығы бар құжаттар. Бағалы терi. Сырт киім тігуде пайдаланылатын, қымбат тұратын құндыз, түлкi сияқты аңдардың терісi. Бағалы терi кәсіпшілігi. Терісi бағалы аңдарды өсірумен және терi өңдеумен айналысатын шаруашылық саласы.