САҒЫМ
зат есім. физикалық. 1. Ауаның біркелкі қызбауына байланысты нысанның бір немесе бірнеше жалған бейнесі байқалатын оптикалық құбылыс. 2. ауыспалы мағына. Бұлдыр, күңгірт, бұлыңғыр ой, нәрсе. 3. ауыспалы мағына. Қол жеткісіз, арман. 4. ауыспалы мағына. Айнымалы, құбылмалы. Сағым болып бұлдырады. Алыстан мұнарту, көз жетпес жерден елес беру. Сағымға садақ ілдірген. көнерген сөз. мифологиялық. Тәңірден ерекше қасиет дарыған (адам) [ Ертедегі аңыз бойынша, Шыңғысханның арғы аналарының бірі –Алон Гоаның есімімен байланысты. Алан Гоаның қайтыс болған күйеуінен екі бала қалады. Бірде Алан Гоа түс көреді. Түсінде бір ақ киімді кісі Алан Гоаның үстінен сақалымен сипап өтеді. Содан кейін аяғы ауыр болып, ұлды болады. Бірбірімен қырғиқабақ болған балаларына шешесі: –Үшеуің де бір-біріңе жат емессіңдер, сенбесеңдер, мына үш садақтың оғын үшеуің аспанға атыңдар, – дейді. Сөйтіп, үш баланың екеуі сдақтың оғын аспанға атқан кезде оқтары ұшып барып қайтадан жерге түседі. Ал үшінші баланың атқан оғы ұшып барып ауада қалқып тұрып қалады. Сондықтан оны Тәңір ерекше қасиет дарытқан бала деп таниды ]. Сағым дала. Ұшы-қиыры көзге көрінбейтін шексіз, кең дала. Сағым қуды. Қол жетпеске ұмтылды, дәме етті. Сағым құшты. Шарықтады, көкке самғады, шалықтады. Сағым кешті. поэтикалық. Жапан далада ұзақ жүрді, қаңғырды.