1омоним зат есім. 1. Түйенің және басқа малдың алқымынан басына дейінгі мойын терісі. 2. сөйлеу. Түйе. 3. этнографиялық. Түйенің мойын терісінен жасалған торсық. 4. этнографиялық. Алтын, күміс шытыралармен әшекейленген яки батырма өрнек салынған, қымбатты бұйымдарды сақтайтын дорба, қалта. 5. ауыспалы мағына. Тау басының түйе мойнына ұқсас иілген жері. Мойнақ келгір. қарғыс сөз. Түйеге айтылатын қарғыс.
2омоним зат есім. 1. кәс. Көріктің отқа жел үрлейтін өңеші, үрімпар. 2. Пышақ және басқалардың сабына салынатын сақина шығыршық. 3. Отқа төзімді материалдардан жасалатын қымталған ыдыс. Мойнақ қалып. Пышақ, қырғы т.б. тұтқасына сақина соғатын қалып. Мойнақ пышақ. Сабына сақина салған (шығыршық кигізген), селебеден кіші пышақ.
3омоним зат есім. 1. құрылыс. Құрылыс жұмысы кезінде бөгеттің қазаншұқырын су басудан қорғайтын топырақ үйінділі қоршау. 2. географиялық. Құрлықтың едәуір ірі бөліктерін, материк пен түбекті өзара жалғастыратын және екі су айдынын бір-бірінен ажыратып тұратын жіңішке алабы.
4омоним: мойнақ шағала. зоологиялық. Шағаланың Қазақстан аумағында кездесетін жоғалып бара жатқан сирек түрі, реликт шағала.