ҚҰМЫРСҚА
зат есім. 1. Топтанып тіршілік ететін бунақденелі жәндік. 2. зоологиялық. Жер шарына кең таралған денесі бас, көкірек және құрсақтан тұратын, басы үлкен, жақтары жақсы жетілген жарғаққанаттылар отрядының бір тұқымдасы. Құмырсқа альдегиді. химиялық. Тұншықтырғыш өткір иісті, күшті улы зат есім. Құмырсқа аяң. ілбіген жай жүріс, баяу қимыл. Құмырсқа бел. а) жіп-жіңішке, нәзік, қыпша бел. ә) этнографиялық. Қынама етіп сәндеп тіккен киім (көйлек, қамзол, кебіс т.б.). Құмырсқа бел шытыра. этнографиялық. зергерлік. Екi шетi жалпақ, ортасы жіпжіңішке бастырма, киімге қадайтын шеттік. Құмырсқа ен. Қойдың екі құлағының ұштарына немесе құлақтың алдынан және артынан кесілген белгі. Құмырсқа жегіш. зоологиялық. Тропикалық Америкада өмір сүретін, тісі жоқ, тек құмырсқа жеп күн көретін жануар. Құмырсқа көш. Баяу, ақырын жүріс, өгіз аяң. Құмырсқа қышқылы. химиялық. Суда, спиртте, эфирде кез келген мөлшерде араласа алатын, қалақай өсімдігінде, құмырсқада болатын, өткір иісті түссіз зат, қарапайым органикалық қышқыл. Құмырсқаның [ құмырсқа ] илеуі. Құмырсқаның ұясы; төмпешік келген үйінді. Құмырсқаның илеуіндей. бейнелі сөзқолданыс. Құж-құж қайнаған, қалың нөпір, қаптаған, құжынаған.