АТМОСФЕРА
[ грек тілі. аtmоs – бу, sphаіra –шар ] зат есім. 1. Жердi қаптап тұрған ауа қабаты. 2. астрономиялық. Күн, жұлдыз сияқты аспан денелерi мен планеталарын қоршап тұрған газ тектес қабат. 3. физикалық. Ауа қысымын өлшейтін бірлік. 4. ауыспалы мағына. кіт. Қоршаған орта; әлеуметтік, қоғамдық, тұрмыстық жағдай. Атмосфера газдары. физикалық. Жер бетінің атмосферасын құрайтын газдар. Атмосферадағы айналым. физикалық. Ауа қабатының қозғалыс жүйесi. Атмосферадағы алмасым. физикалық. Жер бетіндегi тығыздығы төмен жылы ауаның жоғары көтерілуімен қабаттаса суық ауа массасының төмен түсуi. Атмосферадағы температура инверсиясы. физикалық. Ауа температурасының жер бетінен жоғарылаған сайын өсуi. Атмосфера қабаты. географиялық. Жер бетін жауып тұратын ауа қоршауы. Атмосфераны барлап білу. физикалық. Арнайы құралдар (шар ұшқыштар, радиозондтар, метеорологиялық зымырандар, лазерлер, жердің жасанды серіктерi, радиолокациялық және тағы басқа. құралдар) арқылы атмосфера температурасының тік және көлденең таралуын, желдің бағыты мен жылдамдығын, қысымын және тағы басқа. шамаларын анықтау. Атмосфераны қорғау. экологиялық. Атмосфераның барлық қабаттарындағы энергетика мен ауаның химиялық құрамын сақтауды қамтамасыз ететін шаралар жиынтығы. Атмосфера суы. физикалық. Атмосфера ауасында болатын су буы немесе конденсацияның өлшенген өнімдерi (тамшылар, кристалдар). Атмосфера шебi. физикалық. Атмосферадағы өтпелi белдем немесе екi ауа массасының арасындағы (шартты түрдегi) жігi. Атмосфера электрлігi. физикалық. Жер атмосферасындағы электр құбылыстары мен процестерінің жиынтығы.