ЖҰЛДЫЗ
1омоним зат есім. 1. Түнде өздігінен жарқырап, нүктедей болып көрінетін аспан денесі. 2. астрономиялық. Өте күшті қызған газдан (плазмадан) тұратын, өзінен жарық шығаратын және табиғаты жағынан Күнге ұқсас аспан денелері. 3.көнерген сөз. Жылдың он екіден бір бөлігі, ай. 4. ауыспалы мағына. Маңдайалды, халық қалаулысы, майталманы, шамшырағы. Жұлдыз астрономиясы. а с тр. Астрономияның жұлдыздық жүйелер құрылысының, құрамының, динамикасының және эволюциясының жалпы заңдылықтарын, сондай-ақ сол заңдылықтардың біздің Галактикада қалай орындалатынын зерттейтін бөлімі. Жұлдыздар картасы. астрономиялық. Белгілі бір аймақтан көрінетін аспан бөлігіндегі аспан денелерінің орналасуын көрсетіп беретін карта. Жұлдыздар космогониясы. астрон. Жұлдыздардың, сондай-ақ жұлдыздық жүйенің пайда болуы әрі эволюциясын зерттейтін астрономия саласы. Жұлдыздар каталогы. астрономиялық. Белгілі бір біртекті сипаттамалары (экваторлық координаттар, жұлдыздық шамалар, спектрлік кластар, т.б.) көрсетілген жұлдыздардың тізімі. Жұлдыздар шоғыры. астрономиялық. Шығу тегі бірдей, жасы мен химиялық құрамы жағынан бір-бірімен қарайлас және өзара тартылыс күші арқылы байланысқан жұлдыздар тобы. Жұлдыздың оңы. Аспан шырақтарының орналасуының сәті келген уақыты, кезі (байырғы кезде жұлдыздардың орналасуын жұлдызшылар сәтті, сәтсіз деп болжаған). Жұлдыз жымды. поэтикалық. Жер-көк тым-тырыс, тынши қалды. Жұлдыз тарады. Таң қылаң берді, таң ағарды. Жұлдыз толды. жергілікті сөз. Ел орынға отырды, кеш болды. Жұлдызы ақты. мифологиялық. Әр адамның жұлдызы бар, жұлдыз ағып ісі, шаруасы оңалды, Құдай оңдады. Жұлдызы ұшты. а) Өлді, дүниеден қайтты. ә) Бақыты тайды. Жұлдызы ыстық. Кісіні өзіне тартатын қасиетке ие, сүйкімді.