ТЫНЫШТЫҚ
зат есім. 1. Тымтырыстық, жым-жырт болушылық. 2. математикалық. Қозғалыссыз, тұрақты. 3. ауыспалы мағына. Ел арасындағы жақсы қарым-қатынас, бейбітшілік. 4. Алаңсыздық, жайбарақаттық. Тыныштығын алды. Тынышын кетірді, мазасын алды. Тыныштығы табылды. Тыныштанды, тыншыды. Тыныштық алды. Тынышталды, тыншыды. Тыныштық белдемі. экологиялық. Адамдардың демалуы немесе олардың физиотерапиялық емделуі үшін жағдай жасау мақсатымен техногендік әсерлердің мүмкіндігінше ең аз немесе абсолют аз режімі орнатылған аумақ. Тыныштық бермеді. Маза бермеді, мазасын алды. Тыныштық болмады [ бола ма? ]. Тыным тап пады, тыншымады. Тыныштық бітті. Тынышы кетті, мазасызданды. Тыныштық жоқ. Айғай-шу, дабыра. Тыныштық зонасы. географиялық. Тыныштық аймағы (географиялық экватордың солтүстігінен әрі қарай жатқан төменгі қысым зонасы). Тыныштық кетті. Мазасы кетті, мазасызданды. Тыныштық [ жүзін ] көрмеді. Тыным таппады, дамыл көрмеді. Тыныштық қылды. Жайына жүрді, ешкімге килікпеді, соқтықпады. Тыныштық қашты. Берекесi кеттi, мазасызданды, бейберекетсіздікке тап болды. Тыныштық орнады. Тынышталды, бейбітшілік орнады. Тыныштық па? Жай ма, не бүлінді? деген мағынадағы сөзқолданыс. Тыныштық пердесін айырды. бейнелі сөзқолданыс. Жымжырттықты, тыныштықты бұзды. Тыныштық тапты. Тыншыды, тыным алды. Тыныштық таппады. Тыным көрмеді, көңілі жай таппады. Тыныштықтан безді. Тыныштықты қаламады, елдің тынышын бұзды. Тыныштықты қашырды. Мазасын кетірді, мазалады. Тыныштық үйкелісінің коэффициенті. физикалық. Тыныштық үйкелісі күшінің, бір денені екіншісіне қысатын жүктемені түсірген кезде пайда болатын және олардың тиісу бетіне перпендикуляр бағытталған реакция күшіне қатынасы. Тыныштық іздеді. Тыныш жүргісі келді, тыным тапқысы келді.