БАСПАСӨЗ
зат есім. 1. Газет, журнал және тағы басқа. әр кезең сайын шығып тұратын бұқаралық мерзімдi басылым жиынтығы. 2. Баспа өнімдерінің жалпы атауы. 3. ауыспалы мағына. Қандай да бір жеке мерзімдi басылым. Баспасөз атташе. дипломатиялық. Баспасөз мәселесi жөніндегi елшілік өкіметтілігінің қызметкерi. Баспасөз бетi. Газет, журнал т.б. сияқты жарыққа шығарылған мерзімдi басылым өнімi. Баспасөз бостандығы. заң. Мемлекеттегi конституция кепілдік беретін адам құқықтары мен бостандықтарының бірi. Баспасөзге шолу. Билік немесе ресми, бейресми ұйымдар тарапынан бұқаралық сипат тағы мерзімдi басылымдарға басшылық етудің тиімдi тәсілi ретіндегi публицистикалық жанрдың бірi. Баспасөз жанрлары. Баспасөз материалдарының мазмұнына, сипатына қарай бөлінетін түрлерi. Баспасөз клубы. Журналистердi қажеттi ақпаратпен жедел түрде қамтамасыз етудi ұйымдастыратын бейресми ұйым. Баспасөз құралдары. қоғ. әлеум. Бұқаралық ақпарат таратушы басылымдар мен баспа өнімдерi. Баспасөз қызметi. а ) Мерзімдi баспасөз материалдары бойынша ақпарат жинаушы және ендірушi бөлім. ә ) Газет, журналдардағы қызмет, баспасөз iсi. Баспасөз мәслихаты. Мемлекет қайраткерлерінің, саясатшылардың, атақты өнер адамдарының журналистермен өткізетін арнайы кездесуi (ПРЕСС-КОНФЕРЕНЦИЯ). Баспасөз органы. тарихи. Газет, журнал шығаратын ұйым, мекеме. Баспасөз парағы. Журналистерге арнайы дайындалатын белгілi бір шара туралы қысқаша мәлімет. Баспасөз пәрменділігi. саяси. Жалпыхалықтық сипаттағы сайлау, Үлкен [ беделдi ] ұйымдар мен мекемелерде, министрліктерде өткізілетін бұқаралық сипаттағы маңызды мәжіліс, жиналыстар, ондағы iсшаралардың сипаты, мақсаты т.б. туралы қысқаша мәлімет жазылған, өкілеттi мекеме, бөлімшелерге, лауазымды адамдарға алдын ала таратылатын хабарлама (қағаз, құжат). Баспасөз хатшысы. қоғ. әлеум. Қандай да бір ресми органның немесе мелекеттік қайраткерлердің өзіндік тұғырын түсіндіріп тарататын өкілеттi тұлға.