ҰН
зат есім. Астықты диірменге тарту арқылы алынатын, түрлі нан тағамдары пісірілетін шикі азық, тағамдық өнім. Ұн ассортименті. тамақ өнеркəсібі. Ұнның сорттары, түртүрінің жиынтығы. Ұнға аунату. тамақ өнеркəсібі. Кейбір жартылай фабрикаттарды (мыс, ет, балық өнімдерін) майға қуырып пісіру үшін оларды ұнға немесе кепкен нан ұнтақтарына аунатып алу. Ұнды ауаландыру. тамақ өнеркəсібі. Ұнның сапасын жақсарту үшін оны қоршаған ортадағы ауамен қанықтыру [ Ол үшін ұнды ауа ағынымен араластырады, сол кезде ұн ауадағы оттекпен қанығады ]. Ұнды шала қуыру [ пассерлеу ]. Тұздыққа арналған ұнды қуыру [ Май салмай қыздыру кезінде еленген ұнның қалыңдығы 3–5 см болады. Пассерленген ұн көп мөлшерде керек болғанда біркелкі қуырылуы үшін тұзбен араластырып қыздырады ]. Ұн жағу. этнографиялық. Кейбір жерлерде құдаласқан екі жақтың құйрық-бауыр жемес бұрын бір-бірінің беттеріне ақ жағып, ойын-сауық құру, жақындасу үшін жасалатын әзіл рәсімі. Ұн кенелері. зоологиялық. Кене отрядының бір тұқымдасы. Ұн көже. этнографиялық. Қайнап жатқан суға қуырылған ұн қосып пісірілген тағам. Ұннан майда. бейнелі сөзқолданыс. Көзге көрінбейтін, ұсақ. Ұнның ашуы. Ұзақ уақыт жылы жерде сақталған ұнның микроорганизмдер әсерінен қышқылдануы. Ұн тағамдары. тамақ өнеркəсібі. Ұннан дайындалған тағамдар. Ұн тарту. Астық дәндерінің элеваторларда әртүрлі қоспалардан тазаланып ұн зауытының тарту желісіне берілуі. Ұн шаңы [ тозаңы ]. Ұнның ауадағы немесе қонған өте ұсақ түйіршіктері.