АЙМАҚТЫҚ
сын есім. Өлкелік, өңірлік, аймақ бойынша, аймаққа тән. Аймақтық геология. Жер қыртысының үлкен бөліктерінің геологиялық құрылысын зерттейтін ғылым, геологияның бір саласы. Аймақтық геохимия. Үлкен аудандарда тау жыныстарының петрологиялық ерекшеліктеріне байланысты, химиялық элементтердің жоғары концентрациясының пайда болуына себеп болған процестердi зерттейтін ғылым, геохимияның бір саласы. Аймақтық гидрогеология. Үлкен аудандар мен iрi геологиялық құрылымдардың гидрогеологиялық жағдайын, жерасты суларының таралу заңдылығын зерттейтін ғылым, гидрогеологияның бір саласы. Аймақтық ерекшелік. Әрбір аймаққа, өлкеге тән өзіндік сипат; жергіліктi ерекшелік. Аймақтық қоғамдастық. Мүдделерінің ортақтығы негізінде пайда болған белгілі бір территориялық шеңбердегі қауымдастық. Аймақтық лексика. лингвистикалық. Жергіліктi жерде ғана емес, одан гөрi кең аумақта қолданылатын территориясы бар тілдік ерекшеліктер. Аймақтық метаморфизм. Ірi кеңістіктер мен аймақтарда әртүрлi тау жыныстарының минералдық құрамы мен құрамында болатын күрделi өзгерістер жиынтығы. Аймақтық нарық. экономикалық. Бөлек территориялық бөлімше нарығы (республика, облыс, аймақ, аудан бойынша). Аймақтық сөздік. лингвистикалық. Басқа мемлекеттер территориясындағы тіл иелерi, ұлт тілi сөйленістерінің лексикалық ерекшеліктерін қамтитын сөздік. Аймақтық стандарт. Стандарттау жөніндегі аймақтық ұйым қабылдаған және тұтынушылардың қалың көпшілігінің қолы жетімді стандарт. Аймақтық телефон байланысы. Мемлекеттің бір аймағындағы телефон торабы. Аймақтық экономика. Экономика ғылымының өндіріс салалары мен кәсіпорындарды ел аумағының жекелеген өңірлеріне ұтымды орналастыруды, өнімдi өткізу аймақтарын қалыптастыруды көздейтін сала.