ЖАРЫС
зат есім. 1. Бәйге, атшабыс. 2. Спорттық сайыс немесе ойын түрлері мен өнердің бір түрінен сынасу мақсатында өткізілетін арнайы шара. 3. сов. Кеңес өкіметі тұсында еңбек өнімділік арттыру мақсатында еңбек ұжымы немесе оның мүшелері арасында жүлде алу үшін өткізілетін өзара сайыс, бәсеке, сын шарасы. 4. ауыспалы мағына. Бәсеке, егес. 5. ауыспалы мағына. Күрес, күш сынасу. Жарыс автомобилі. спорт. Автомобиль спортына және шапшаң жүруден рекорд жасауға арналған бір не екі орынды автомобиль. Жарыс әдісі. Білім алуға тәрбиеленушілердің барлығын қоғамдық пайдалы еңбекке белсенді, шығармашылықпен қатыстыру әдісі. Жарысқа қамтылды. жергілікті сөз. Жарысқа қатысты. Жарысқа салды. Бәйгеге қосты, бәсекеге түсті. Жарыс қойды. Қатарласа шапты. Жарыс төрешісі. Жарыста билік ететін адам. Жарыс туы. сов. Кеңес өкіметі тұсында еңбек ұжымдары арасында еңбек өнімділігін арттыру мақсатындағы өткізілетін бәсекеден озып шыққан ұжымға салтанатты түрде табыс етілетін жеңіс белгісі ретіндегі ту.