ОРАЗА
[ ир. ﺮﻭﺯﻩ ] зат есім.діни. 1. Мұсылмандар күнтізбесі бойынша, тоғызыншы ай есебіне тура келетін, қасиетті саналатын рамазан айы. 2. Рамазан кірісімен осы ай бойы тәуліктің күндізгі уақытында ауыз бекітіліп, күн шыққаннан күн батқанға дейін ас-су ішуге болмайтын, ислам дінінің бес парыздың бірі ретіндей ғибадат. 3. Бес парызға кірмейтін мұсылман адамның таң атысынан кеш батысына дейін ас-су ішпей ауыз бекітуі ретіндегі сүннет, уәжіп ғибадат түрі. Ораза айт. діни. Ораза айы біткен соң үш күн бойы ауыл аралап, дәм тататын діни мейрам. Ораза ашар. діни. Ауызашар (ораза ашқанда ішетін тағам). Оразасын ашты. а) діни. Аузын ашты. ә) Ертеңгi тамағын iштi. Ораза тұтқызу. діни. Ораза ұстату, ауыз бекіттіру. Ораза тұтты. Ауыз бекітті, ораза ұстады. Ораза тұтушы. діни. Ораза ұстаушы, ауыз бекітуші адам. Ораза тұтты [ ұстады ]. діни. Қасиетті Рамазан айында таңның атысынан кештің батысына дейін ас-су ішпей ауыз бекітті, мұсылмандық негізгі парызының бірін өтеді.