НЫСАНА
зат есім. 1. Көздеп ату үшін алынған қарауыл, белгі. 2. спорт. Сопақша тақтайларға жапсырылып, бетіне дөңгелек белгілер салынған қағаз немесе ұшатын табақтар. 3. әскери сөз. Қарсыластың жойылуға белгіленген нысаны. 4. ауыспалы мағына. Алға міндет етіп қойған мақсат. Нысанаға алды. а) Мылтық сияқты оқпен атылатын қаруын бір нәрсеге қарай бағыттады, көздеді. ә) Меңзеді, ишарат білдірді. б) Мақсат етті, межеледі. Нысанаға шаншылма. Біреудің көздер жеріне айналма, көзге түспе. Нысанадағы тесік. спорт. Нысанадағы оқ тиген тесіктер. Нысанадағы шар. спорт. Бильярдтағы ұратын шардан басқа шарлар. Нысана етті. Алдына мақсат қойды. Нысана көздеу. спорт. Ататын және пневматикалық қарумен, орбалет атудан, сол сияқты садақ тартудан жарысатын ежелгі спорт ойындарының бірі. Нысана көздеу стенді. спорт. Стенд атуға арналған спорт амбары. Нысананы көрсету. әскери сөз. Нысананың орналасқан орнын қысқаша, айқын, түсінікті етіп көрсету.