САҚТАНДЫРУ
Сақтандыр етістігінің қимыл атауы. 1. Қорғаныс, сақтық жасату, алдын алу. 2. экономикалық. Жеке және заңды тұлғалардың мүліктік мүдделерін олардың төлеген сақтандыру жарналарынан құралатын ақша қорлары есебінен қорғау жөніндегі азаматтыққұқықтық қатынастар. Сақтандыру агенті. экономикалық. Берілген өкілеттігіне сәйкес сақтандыру ұйымының атынан және соның тапсыруымен сақтандыру шарттарын жасасу жөніндегі делдалдық қызметті жүзеге асыратын жеке немесе заңды тұлға. Сақтандыру делдалы. экономикалық. Өзінің қызметін сақтандырылушылармен және сақтандырушылармен келісім негізінде жүзеге асыратын тәуелсіз делдал. Сақтандыру жағдайы. экономикалық. Сақтандыру шартының талаптарында қарастырылған оқиғаның болуы. Сақтандыру жарнасы. экономикалық. Сақтанушы немесе оның атынан сақтандыру үшін сақтандырушыға төлеуге міндетті төлем. Сақтандыру компаниясы. экономикалық. Азаматтарға, кәсіпорындарға олардың қызметі мен өмірінде сақтандыру жағдайлары басталғанда зиянның орнын толтыру және көмек көрсету жөніндегі операцияларды жүзеге асыратын заңды тұлға. Сақтандыру кооперативі. Жеке басты сақтандыру, медициналық сақтандыру, мүлікті, жерді, егістікті сақтандыру жөнінде алуан түрлі қызметтер көрсету үшін құрылған ұйым. Сақтандыру куәлігі. экономикалық. Сақтандыру компаниясы сақтандыру шартын жасасу кезінде сақтандыру полисі берілгенге дейін беретін сақтандыру құжаты. Сақтандыру қоры. экономикалық. Дүлей апаттар мен басқа да төтенше оқиғалар келтірген зиянның алдын алуға, жоюға және орнын толтыруға арналған заттай және қаржы қорлары нысанында құрылатын қаражаттың қосалқы қоры. Қоғамның сақтық қорларының құрамдас бөлігі болып табылады. Сақтандыру құны. экономикалық. Азаматтардың мүлкі, өмірі, денсаулығы сақтандырылған ақшалай қаражаттың мөлшері. Сақтандыру қызметі. экономикалық. Сақтандыру (қайта сақтандыру) ұйымының сақтандыру (қайта сақтандыру) шарттарын жасасумен және орындаумен байланысты қызметі. Сақтандыру өтемі. экономикалық. Сақтандырушы сақтандыру жағдайының басталуы себепті сақтанушыға төлейтін ақшалай өтем. Сақтандыру полисі. экономикалық. Сақтандыру қоғамы сақтандырылған адамға немесе мекемеге беретін, сақтандыру туралы жасалған шарттың талаптары баяндалған куәлік. Сақтандыру резервтері. экономикалық. Сақтандыру (қайта сақтандыру) ұйымының актуарлық есеп айырысулар негізінде бағаланатын сақтандыру (қайта сақтандыру) шарттары бойынша міндеттемелері. Сақтандыру рыногі. экономикалық. Сақтандыру бойынша қызметтер көрсету саласы. Сақтандыру сертификаты. экономикалық. Сақтандырушы сақтанушыға бас полистің күші жүретін жекелеген жүктің сақтандырылғанын растау ретінде беретін құжат. Сақтандыру сомасы. экономикалық. Сақтандыру объектісі сақтандырылған және сақтандыратын жағдай туғанда сақтандырушы жауапкершілігінің шекті ауқымын білдіретін ақша қаражатының сомасы. Сақтандыру сыйлықақысы. экономикалық. Сақтанушы сақтандырушыға сақтандыру үшін төлейтін сақтандыру жарнасы, ақшалай сомасы. Сақтандыру тарифі. экономикалық. Сақтандыру жарнасының мөлшерлемесі. Сақтандыру тәуекелдігі. экономикалық. Ықтимал қауіп-қатер мен кездейсоқтық; сақтандырылатын болжалды оқиға. Сақтандыру шарты. экономикалық. Сақтанушы мен сақтандырушы арасындағы олардың өзара міндеттемелерін тәптіштейтін келісім.