ЗЕЙНЕТАҚЫ
зат есім. әлеум. экономикалық. Еңбек адамына құрметті демалысқа шыққаннан кейін ай сайын берілетін төлемақы; азаматтарға белгілі бір жасқа толғанда, мүгедектігіне байланысты, асыраушысынан айырылғанда, арнаулы қызмет атқарған жылдары үшін, сондай-ақ заңнамада көзделген басқа да реттерде берілетін тұрақты ақшалай төлемақы. Зейнетақы активтері. экономикалық. Зейнетақы төлемдерін қамтамасыз етуге арналған қаражат. Зейнетақы қорланымдары. экономикалық. Жинақтаушы зейнетақы қорларына аударылған міндетті және ерікті жарналарын, сондай-ақ жинақтаушы зейнетақы қорларының инвестициялық кірісті қоса алғанда, зейнетақы төлемдерін алушының дербес зейнетақы шоттарында көрсетілген ақшалай қаражаты. Зейнетақы қоры. а) Ұйымдар мен мекемелерде жұмыс істейтін жеке тұлғалардың ай сайынғы жалақысынан ұсталатын оннан бір бөлігін жинақтайтын қор. ә) Зейнетақы төлеуге арналған мақсатты қор. Зейнетақы шарты. Зейнетақы жарналары мен қорланымдарына байланысты құқық қатынастарын орнату, өзгерту немесе тоқтату туралы, бір жағынан, жинақтаушы зейнетақы қорлары, екінші жағынан, салымшы немесе алушы арасында жасалатын шарт (келісім).