МЕКТЕП
[ араб тілі. ﻤﻛﺗﺐ ] зат есім. 1. Бастауыш, орталау және орта дәрежелі жалпы білім беретін оқу орны. 2. педагогикалық. Жас ұрпаққа білім, тәрбие беретін мекеме; білім беру жүйесінің негізгі буыны. 3. Орта білімнің толық курсы. 4. Бастауыш, орта білім беретін оқу орнының ғимараты. 5. ауыспалы мағына. Мектеп ұжымы, мұғалімдер. 6. ауыспалы мағына. Бір нәрсені үйреніп шығатын, үлгі, өнеге, тәжірибе алатын орны. Мектеп ашты [ салды ]. Бастауыш, орта білім беретін оқу орнын ашып, бала оқытты. Мектеп бағдарламасы. педагогикалық. Жалпы білім беретін орындардың ерекшеліктеріне қарай дайындалып, оқушыға берілетін білім көлемімен мазмұнын, оқытылатын пәндердің мақсатымен міндеттерін анықтап көрсететін құжат. Мектеп бітірді. Орта дәрежелі жалпы білім беретін оқу орнын тәмамдады. Мектеп бітірушi. Орта білім беру орнын оқып, аяқтаушы түлек. Мектеп гигиенасы. Мектеп оқушыларына, мектептегі білім беру жүйесіне, құралжабдықтарына, т.б. қойылатын тазалық, денсаулық сақтау талаптары. Мектеп есігін ашты. Алғаш рет мектепке барды, оқуға барды. Мектеп инновациясы. педагогикалық. Мектеп басқарудағы маңызды жаңа енгізулер жиынтығы. Мектепке барды. Мектеп табалдырығын аттады, мектептен білім алмақ болды. Мектепке берді. Оқытты, оқуға берді. Мектеп көрген. Жүйелі білім алған, оқыған, көзі ашық. Мектептен өтті. Білім алды, тәжірибе жинақтады, тәрбие алды.