ШЫЛБЫР
зат есім. этнографиялық. Атты бір жерге байлау яки жетектеп жүру үшін ноқтаға, жүгеннің сулығына тағылатын, қылдан есілген жіңішке жіп немесе жалпақ қайыс. Шылбыр берді. а) Көмектесті, жәрдемдесті. ә) Билік берді. Шылбыр бойы. Қашықтығы, ұзындығы шылбырдың ұзындығындай. Шылбыр жаға. географиялық. геод. а) Өзеннің биік жағасын судың шайыпбұзуы салдарынан етегінде пайда болатын (беті тегіс) өсімдіксіз, енсіз өңір. ә) Кейде су басып қалатын өзен мен канал бойындағы жол. Шылбыр қашаған. Пысық. Шылбыр ұстатпады. Маңына жуытпады, зымырап, ағып өтті (жүйрік ат туралы). Шылбыр ұшын сұрады. Көмек, жәрдем тіледі. Шылбыр ұстату. Ат жарысында таңдаулылар алдында келу; бәйгеге іліну. Шылбырына жармасты. Шаужайынан алды. Шылбырына оралды. Күтті, қызмет көрсетті деген мағынада.