ҮКІЛІ
сын есім. Үкісі бар, үкіленген. Үкілi бота. «Көз тиедi» деген ұғыммен ноқтасына, төбесіне үкінің қауырсынын тағып сәндеген бота. Үкілі бөрік. этнографиялық. Төбесіне үкі таққан сәнді бас киім. Үкілi домбыра. а) Бәсекежарыс, көрмелерде өзінің шешендігімен, домбырашының шебер тартуымен үздік бағаланып жүлде алған, ел арасына атағы шыққан, иесін тілкөзден сақтасын деген ниетпен басына үкi тағып ұстайтын хас шебердің қолтума домбырасы. ә) Қасиетті, қастерлі домбыра. Үкілі жүген. қолөнер. Сәндік үшін яки ырым етіп үкі қауырсыны тағылған жүген. Үкілі қыз. этнографиялық. Айттырылып қойған қыз. Үкілі пошта. көнерген сөз. Ресми түрде жедел жіберілетін хатқағаз. Үкілі сәукеле. этнографиялық. Төбесі үкінің қауырсындарымен әшекейленген сәукеле. Үкілі тымақ. этнографиялық. Үкі тағылған тымақ.