САУЫР
1омоним зат есім. 1. Малдың бел омыртқасынан құйымшақ тұсына дейінгі жерінің үсті. 2. Малдың бел омыртқасынан құйымшақ тұсына дейінгі жерінің дәмді әрі майлы болатын еті. 3. анатомиялық. Адамның бел омыртқасынан құйымшағына дейінгі артқы тұсы. 4. Малдың белдеме жон, сан үсті терісінен жасалатын былғарының қалың түрі. 5. ауыспалы мағына. Көкорай шүйгіні мол, шұрайлы, құнарлы жер. 6. ауыспалы мағына. Жер бедерінің ойлыдөңесті жерлерінің немесе кең жазықтың үстіңгі жағы. 7. ауыспалы мағына. Бір нәрсенің негізі, тірегі. 8. ауыспалы мағына. Ел ішіндегі беделді, белді, дәулетті адам. 9. ауыспалы мағына. Жуан сауыр, бай, өктем әлеуметтік топ өкілі. Сауыр айналды. жергілікті сөз. Қоныс аударды. Сауырда [ сауырынан ] су төгілмес жорға. бейнелі сөзқолданыс. Сауыры жайпақ, жорға жүрісті мықты аттың сыны. Сауыр етістік. Мал сойғанда малдың сан жіліктерінен бөлініп алынған жұмсақ әрі дәмді құйымшақ еті. Сауыр етіктің табаны талда. бейнелі сөзқолданыс. Қанша берік былғарыдан болса да, табансыз етік болмайды деген мағынада. Сауырсы бұзылмады. Сауырсы мықты, берік болды. Сауыры ашыды. Қатты қынжылды, қиналды. Сауыры езілді. іштей елжіреді, жаны ашыды. Сауыры майға бөкті. Семірді, күтімі жақсы болды. Сауырын алғызды. Соққы көріп, беті қайтты. Сауырын сипады. Жеңіл-желпі сөйлеп, шығарып салды. Сауырын ұстатпады [ сипатпады ]. Жеткізбеді, жолатпады, жақындатпады. Сауырына қамшы тиді. Өмір, тұрмыс қысымшылығын көрді, тауқымет тартты. Сауырынан басты [ басып жүрді ]. Таңдап, іріктеп алды. Сауырынан бит домалап түскендей. бейнелі сөзқолданыс. ірі әрі семіз (мал). Сауырынан бит домалаған. Ауқатты, бай; семіз. Сауырынан су төгілмес жорғадай. Жүрісі өте жайлы, жақсы желетін.