КІСЕ
[ ир. ] зат есім. этнографиялық. 1. Белбеуге шытыра қадап бекіткен былғары қалта. 2. Адамның әлеуметтік дәрежесін танытатын, ұсақ-түйек зат салып жүруге арналған күміспен, алтынмен, жезбен әшекейленген қалтасы бар жалпақ былғары белбеу. Кiсе белбеу. этнографиялық. а) Байырғы кезде адамның тектілігін, дәрежесін көрсететін, былғары қалтасы бар, күміспен, асыл тастармен әшекейленген белбеу. ә) Қалталары бар, қару iлінетін белбеу. Кiсе белдік. этнографиялық. Кісе, қалтасы бар белдік, кіселi белдік. Кiсе кемер. а) этнографиялық. көнерген сөз. Оқ-дәрi, қаружараққа қажеттi басқа да ұсақтүйекке арналған қалтасыз, күміспен кемерленген, әшекейлi күміс белбеу. ә) әскери сөз. Әскери адамдардың портупейi. Кiсе қоспақ. кәс. Екi өркешінің арасы өте жақын қоспақ түйе. Кісе қуырдақ. тамақ өнеркəсібі. Негізінен жаңа сойылған малдың өкпе, бауыр, бүйрек, ішек қарынына сарымсақ, бек деп аталатын шөп турап араластырып, қуырылатын тағам. Кісе салды. Бұғау, тұзақ кигізді. Кiсесінен басты. Белінен басты, белін үздi. Кiсесінен белгілi. Тумысынан, жетесінен әйгілi, анық.