ЖАРНАМА
[ ир. ]зат. 1. Тұтынушылардың назарына іліктіру немесе қандайда бір сауалнама алу мақсатында тауар, өнер туындылары және қызмет түрлерінің қасиеттері туралы кең таратылып жария етілетін хабарлама. 2. Тұтынушылардың назарына іліктіру мақсатында тауар, өнертуындылары және қызмет түрлерінің қасиеттері туралы хабарламаны таратудың қағаз, радио хабарлама, бейнешығыршық, жазба мәтін т.б. түріндегі құралы. 3. Маңдайшаларда берілетін ұйым не мекеме туралы ақпарат. 4. Афиша спектакль, концерт, жиналыс, дәріс, спорттық жарыстар, ойынсауықтар туралы қағаз хабарлама. 5. Танымалдығын арттыру, жұрт назарына ілігу мақсатында біреу немесе бір нәрсе туралы таратылған мәліметтер. // Жазбаша түрдегі, жарияланған. Жарнама беруші. Теледидар, радио т.б. сияқты бұқаралық ақпарат құралдарына өз тауарын не қызметін әйгілеу үшін тұтынушыларға арналған хабарламаның иесі, сол тауар не қызмет түрінің өндірушісі. Жарнама жасады. а) Өзін, ісін немесе өндірген тауары мен қызметін жұртқа әйгіледі. ә) жағымсыз. Тауары мен өніміне, қызметіне және тағы басқа. көп тұтынушы жақтаушы табуды ғана көздеп, олардың шын мәніндегі сапасын боямалап, көтермелеп жұртқа жария қылды немесе ешбір негізсіз атаққұмарлықпен өзін жұртқа мадақтады. Жарнама қағазы. Жарнама жазылған қағаз. Жарнама проспектісі. Қандай да бір тауар не қызмет түрін жұртшылыққа әйгілейтін хабарлама жазылған көрнекі құрал. Жарнама тақтасы. Жарнама ілінетін тақта.