ТӨТЕНШЕ
сын есім. 1. Айрынша, ерекше. 2. Шұғыл жағдайларға байланысты. Төтенше бюджет. экономикалық. Жай бюджетке (ағымдағы кірістер мен шығыстар бюджетіне) қосымша түрде жасалатын мемлекет кірістері мен шығыстарының тізбесі. Төтенше жағдай. Табиғат апаты, соғыс қаупі, техногендік апат, халық ішіндегі толқу, т.б. жағдайларда мемлекетке төнген түрлі қауіпке байланысты президент немесе парламент жариялайтын уақытша режім. Төтенше және өкілетті елші. дипломатиялық. Бір елдің екінші елге төтенше жағдайларда жіберілетін белгілі өкілеттілігі бар елшісі. Төтенше заңдар. заң. Төтенше жағдай кезінде қабылданатын заңдар. Төтенше кірістер. экономикалық. Төтенше бюджетте қарастырылатын мемлекеттік кірістер. Төтенше салықтар. экономикалық. Жеке және заңды тұлғалардың әлдебір төтенше жағдайлар (соғыс, дүлей апат, т.б.) болғанда мемлекеттік бюджетке төлейтін міндетті төлемдері. Төтенше шығыстар. экономикалық. Төтенше бюджетте қарастырылатын мемлекеттік шығыстар.