НАМАЗ
[ араб тілі. ] зат есім.діни. 1. Ислам дінін ұстаған діндар адамдардың мұсылмандық бес парызының негізгісі; Аллаға бағыштап күніне бес рет бекітілген қимыл ишараттар жүйесіне сәйкес белгіленген уақыт бойынша, Құран сүрелері мен дұға оқып өтейтін құлшылығы. 2. Жаназа намаз (қайтыс болған адам рухына бағышталып оқылатын намаз). 3. ауыспалы мағына. бейнелі сөзқолданыс. Сүйген іс. Намазға жығылды. а) Құдайға құлшылық етіп, намаз оқыды. ә) Мұсылман діні жолына түсті, бес уақыт парыз намаз оқи бастады. Намаз бөлмесi. сөйлеу. Намазжай. Намазға ұйыды. Сәждеге жығылды, жанжақтағының бәрін ұмытып, Алла алдындағы құлшылығын ғана ойлады. Намазға іждәт қылды. діни. Намаз оқуға міндеттенді, бес уақыт Аллаға құлшылық етіп, намаз оқуға мойынсұнды. Намаз оқу. діни. а) Бес уақыт сәждеге бас қою. ә) Мұсылманның Алла алдындағы бес парызының бірін өтеп, Аллаға құлшылық ету, мұсылмандық жолға түсу. Намаз оқушы. діни. Намазхан адам, Аллаға құлшылық етіп, мұсылманның бес парызының бірі ретіндегі намазды орындаушы кісі. Намаз оқыды. діни. Аллаға құлшылық етіп, мұсылманға парыз етілген ғибадатын тәртібі, рәсімі бойынша орындады. Намаз палуан. Намазхан, намаз оқитын адам. Намаз сабағындай. Мұқият, тиянақты, тыныш. Намазы бұзылды. діни. Намаз оқудың исламдық шарттарына сәйкес намазды бұзатынкүнә немесе мәкрүк әрекет жасады. Намазы қаза болды. а) Бес уақыт намазы оқылатын мерзімі өтіп кетті, оқылмай қалды, мойнына парыз болып қалды. ә) сөйлеу. Бір нәрсесі кетті ме, бір нәрсе боп қала ма деген мағынада. Намазын қаза жібермедi. діни. Намазын қаза етпедi, ылғи уақытында оқып отырды. Намазын қаза қылды. діни. Намазын уақытылы оқымады, парызын өтемедi. Намазын тастамайды. Намазын мезгілінде оқиды, дін жолына берілген адам қаза қылмайды.