МҮЙІЗ
зат есім. 1. Кейбір жабайы жануарлар мен малдың бас сүйегіндегі қатты өсінді. 2. биологиялық. Маңдай сүйегі мүйіз өсіндісін қаптап тұрған тері туындысы. 3. зоологиялық. Қазіргі кезде тіршілік ететін тұяқтылардың басындағы қатты өсінділер (қорғаныш және жекпе-жек құралы). 4. ауыспалы мағына. Қолмен ауыр жұмыс істегендіктен алақан терісінің қалыңдап сіріленуі, қатуы. Мүйіз жіп. этнографиялық. Малдың мүйізіне байланып қойған даяр жіп. Мүйіз өрнегі. этнографиялық. Жанжануарлардың мүйізінің пішіндеріне ұқсас қазақтың ұлттық оюының жалпы атауы. Мүйіз сақинасы. Сиырдың мүйізінде болатын кертік шығыршық. Мүйіз шайқады. Қорқытты, ренжітті. Мүйіз шақша. Мүйізден жасалған шақша. Мүйіз шықты. кекесін. Қарық болды, кенелді, жетісті. Мүйіз шықты ма [ мүйіз шықса, қане ]? кекесін. Бір істің аяғы жақсы болмайтынын, болмағанын білдіру үшін айтылатын әрі кею, әрі кекесін мәнді сөз. Мүйізі қарағайдай. а) Тіке өскен өте ұзын мүйізді (мал). ә) Мықты, зор, нағыздың өзі, дәрежесі жоғары, елге танымал. Мүйізі қарағайдай болды. а) Елден озды, ерекшеленді. ә) Атақдәрежеге ие болды, табысқа жетті. Мүйізінен ұрған өгіздей. Есеңгіреген, мәңгірген. Мүйізіне ілді. Шет қақпайлады, сыйыстырмады, күн көрсетпеді. Мүйізі сырқырады. Жаны ашыды, есіркеді.