МАЙДАН
[ ир. ] зат есім. 1. Соғыс; кескілескен ұрыс, шайқас. 2. әскери сөз. Қарулы күштердің белгілі бір бағытта соғыс қимылдарын жүргізу үшін бір қолбасшының қарауына оперативті топтастырылуы. 3. әскери сөз. Әскер сапының маңдайшеп қатары. 4. әскери сөз. Соғыс қимылдары жүріп жатқан аймақ. 5. Кең алаң, айдын жер. 6. жергілікті сөз. Алаң, егістік жер. 7. жергілікті сөз. Сырт көше, дала. 8. көнерген сөз. ауыспалы мағына. Сән-салтанат, шеру. Майдан авиациясы. әскери сөз. Әскери-әуе күштерінің соғыс операцияларына қатысушы бір бөлігі. Майдан алаңы. Соғыс, әскери iсқимылдар жүріп жатқан жер. Майданға түсті. а) Сайысқа, ұрысқа шықты. ә) Сыннан өтті, сынға түсті, сыналды. Майданға шықты. Майданға, ұрысқа аттанды. Майдандағы армия. әскери сөз. Ұрыс майданында әрекет етуге белгіленген әскер. Майдан даласы. а) Соғыс жүріп жатқан алаң, кескілескен ұрыс алаңы. ә) Соғыс жүріп жатқан жерде, алдыңғы шепте соғысушы әскер. Майдан ені. әскери сөз. Шабуылшы немесе қорғанушы бөлімнің (бөлімшенің) екі қаптал аралығындағы қашықтығы. Майдан мүгедегі. Қан майданда, соғыста жарақат алып қайтқан, әлеуметтік қамқорлықты қажет ететін адам. Майданның қақ төрінде. Сұрапыл соғыс ортасында, соғыстың алғы шебінде. Майданның өті. Қан майданның ортасы, нақ өзі. Майдан соқ жасады. Жанжал шығарды, ұрыс салды. Майдан шебі. әскери сөз. Шабуыл кезінде әскердің алдыңғы бөлімі алған немесе қорғаныс кезінде орналасқан шеп.