ҰРЫС
1омоним зат есім. 1. Соғыс, шайқас. 2. Керіс, талас, жанжал. Ұрыс дағдарысы. әскери сөз. Ұрыс қимылдары барысындағы шешуші кезең. Ұрыс даласы. Майдан даласы. Ұрыс жоспары. әскери сөз. Ұрыс қимылдарын жоспарлау жөніндегі құжаттар жиыны. Ұрыс жүргізу. Соғысу, ұрысқа шығу. Ұрыс қимылдары. әскери сөз. Қарулы күштердің барлық түрлерінің, бөлімдерінің, құрамаларының, бірлестіктерінің қойылған ұрыс тапсырмасын орындау барысында ұйымдасқан қимылдары. Ұрыс қылды. Наразылық білдірді, керісті. Ұрыс мәшинесі. әскери сөз. Түгелдей немесе жартылай сауыттанған, ұрыс жүргізуге, ұрыстық қимылдарды қамтамасыз етуге және әскерді басқаруға арналған қару-жарақ орнатылған шынжыр табанды немесе дөңгелекті өздігінен жүретін мәшине. Ұрыс салды. а) қолма-қол ұрысқа кірісіп кетті, соғысты. ә) Жанжал шығарды. Ұрыс сипаты. әскери сөз. Белгілі бір ұрысқа тән жалпы сипаттар мен қасиеттердің және оның ерекшеліктері мен өзіне тән белгілерінің жиынтығы. Ұрыс тиімділігі. әскери сөз. Қарудың ұрыстық тиімділігі, оның әртүрлі жағдайдағы ұрыс тапсырмасын орындауға бейімделу деңгейі.