АЙДАРЛЫ
сын есім. 1. Айдары бар, айдары үлкен. 2. ауыспалы мағына. Атышулы, белгілi, атақты. Айдарлы аражегіш. зоологиялық. Қаршыға тобына жататын, басында айдары бар жыртқыш құс. Айдарлы бозторғай. зоологиялық. Бозторғай тұқымдасына жататын, басында айдары бар құс. Айдарлы [ көк ] кепеш [ тақия ]. этнографиялық. Әдетте күйшi, салсерілер көп киетін төбесінде қысқалау жіпке тағылған күлтесi бар тақия түрi, кестеленген, әсем, әшекейленген баскиім. Айдарлы қарала үйрек. зоологиялық. Үйрек тұқымдасына жататын, басында айдары бар қара ала құс. Айдарлы құмай. зоологиялық. Сұңқар тәрізділер отрядының америка құмайлары тармағына жататын, күндіз белсендi тіршілік ететін, өлексемен қоректенетін жыртқыш құс. Айдарлы сарышымшық. зоологиялық. Торғайлар отрядына жататын, шағын денелi, басында айдары бар құс. Айдарлы суқұзғын. зоологиялық. Ескекаяқтылар отрядына жататын бірқазан туыстас, басында айдары бар үлкен құс. Айдарлысы құл, тұлымдысы тұл болды. Еркек кіндігi мен әйелдерi түгел құлдыққа салынды, зәбір көрдi. Айдарлысын құл, тұлымдысын күң етті. Еркек кіндік кісi мен әйел жұртын құлдыққа салып қорлады, зәбірледi. Айдарлы түйеқұс. зоологиялық. Жайдақтөстi құстардың казуар тектестер отрядына жататын, басында мүйіздi айдары бар iрi құс.