КЛАССИКАЛЫҚ
сын есім. Классикаға тән, классикаға қатысты. Классикалық әдебиет. әдеб. Үлгілі, кемелденген, жоғары сапалы, қай заман үшін де идеялық, көркемдік мәні үлгілі, аса бағалы әдебиет. Классикалық би. өнертану. Би өнеріндегі канонға айналған көркемдік тәсілдер жүйесі. Классикалық білім. педагогикалық. Басты пәндер ретінде ежелгі тілдер мен математиканың жүйелі түрде оқытылуын көздейтін жалпы орта білім. Классикалық ертегілер. фольклор. Әлем халықтары арасында кеңінен тараған, сюжеті мен кейіпкерлері көп халықтар ертегісінде ортақ, танымал хайуанаттар жайлы ертегінің бір тобы. Классикалық күрес. спорт. Күрестің белден төмен ұстауға, аяқпен айлатәсіл қолдануға болмайтын түрі. Классикалық механика. физикалық. Негізіне Ньютон заңдары жататын және жарық жылдамдығымен салыстырғанда аз жылдамдықпен қозғалатын макроскопиялық денелердің қозғалысын қарастыратын механика. Классикалық осциллятор. физикалық. Тұрақты тепетеңдіктің маңайында тербеліс жасайтын механикалық жүйе. Классикалық өнертану. а) Ежелгі дәуір өнері. ә) Әртүрлі елдердің мәдени гүлдену кезеңдеріндегі мұралары. Классикалық статистика. физикалық. Классикалық физика заңдарына бағынатын көп бөлшектер жүйесін зерттейтін статистикалық механика бөлімі.